نارووال: مسلم لیگ ن کے رہنما احسن اقبال نے کہا ہے کہ آج کوئی لاہور والا یہ نہیں چاہتا کہ لاہور کراچی بنے لیکن کراچی کا ہر شہری چاہتا کہ کراچی لاہور بنے۔
تفصیلات کے مطابق مسلم لیگ ن کے رہنما احسن اقبال نے یوتھ کنونشن سے خطاب کرتے ہوئے کہا کہ بلاول بھٹو ہماری جماعت پر تنقید کرنے سے پہلے اپنی کارکردگی کا جائزہ لیں، آپ کی حکومت نے کراچی کو کھنڈرات کا شہر بنا دیا۔
مسلم لیگ ن کے رہنما نے کہا کہ شہباز شریف نے 2008 سے 2018 تک لاہور کو روشنیوں کا شہر بنا دیا، آج کوئی لاہور والا یہ نہیں چاہتا کہ لاہور کراچی بنے لیکن کراچی کا ہر شہری چاہتا کہ کراچی لاہور بنے۔
انہوں نے کہا کہ لاڑکانہ پیپلزپارٹی کی سیاست کا مرکز ہے، چیلنج ہے بلاول بھٹو میرے نارووال کا اپنے لاڑکانہ سے مقابلہ کر لیں، اگر لاڑکانہ نارووال سے بہتر ہوا تو میں سیاست چھوڑ دوں گا اور اگر میرا نارووال ان کے لاڑکانہ سے بہتر ہو تو انہیں سیاست چھوڑ دینی چاہیے۔
احسن اقبال کا کہنا تھا کہ بلاول بھٹو کو اس طرح کے بے بنیاد اور غیر اخلاقی بیان دینے سے پرہیز کرنا چاہیے، مسلم لیگ ن وہ جماعت ہے جس نے نوجوان کو لیپ ٹاپ سے دئیے، ہمارے مخالفوں نے وہ لیپ ٹاپ چھینے اور کہا کہ ہم مرغی اور انڈے دیں گے۔
احسن اقبال نے مزید کہا کہ انہیں نہ مرغی اور انڈے دئیے گئے بلکہ ان سے لیپ ٹاپ بھی چھین لئے گئے، کیا کوئی پاکستانی اپنے شہیدوں کی توہین کرنے والوں کو ووٹ دے سکتا ہے۔
