اسلام آباد : وفاقی وزیر احسن اقبال نے اعلان کیا کہ الیکشن اکتوبر 2023 میں ہوگا، عمران خان دھرنا ملتوی کرکے تیاری کریں۔
تفصیلات کے مطابق وفاقی وزیر احسن اقبال نے میڈیا سے گفتگو کرتے ہوئے کہا کہ چین کے صدر نے 2014میں پاکستان دورے کا اعلان کیا، عمران خان نے پاکستان میں لانگ مارچ کرکے دورے کو ناکام بنایا۔
احسن اقبال کا کہنا تھا کہ چینی صدر کے دورے کوناکام بنانے کیلئے دھرنا دیا گیا، دورہ ملتوی ہونے سے10مہینے سی پیک تاخیر کا شکار ہوا۔ وفاقی وزیر نے کہا کہ وزیراعظم شہبازشریف کا چین کا دورہ متوقع ہے، وزیراعظم کےدورے سے سی پیک کو طاقت مل سکتی ہے، اس موقع پر عمران خان دوبارہ دھرنوں کی باتیں کررہے ہیں۔
ان کا مزید کہنا تھا کہ عمران خان آئی ایم ایف معاہدے کی بھی مخالفت کرتے رہے اور بھارت بھی پاکستان کے آئی ایم ایف پروگرام کو ناکام بنانےکی کوشش کررہا تھا۔
احسن اقبال نے کہا الیکشن کا اعلان کرتا ہوں جو اکتوبر 2023 میں ہوگا، اگلے 6 سے 8 مہینے کوئی الیکشن نہیں ہوسکتا کیونکہ مارچ میں نئی مردم شماری ہوگی۔
وفاقی وزیر نے واضح کیا کہ اکتوبر 2023سےپہلےکوئی الیکشن نہیں ہوگا، عمران خان دھرنے اورمارچ کا اعلان ختم کریں اور اب الیکشن کی تیاری کریں۔
