وفاقی وزیر منصوبہ بندی احسن اقبال نے اعتراف کیا ہے کہ غیر ملکی سرمایہ کار پاکستان نہیں آ رہے ہیں ہمیں نئی صلاحیتوں کی ضرورت ہے۔
اے آر وائی نیوز کے مطابق وفاقی وزیر منصوبہ بندی اور ترقی احسن اقبال نے اسلام آباد میں نویں فرنٹیئرز آف انفارمیشن ٹیکنالوجی کی بین الاقوامی کانفرنس سے خطاب کرتے ہوئے یہ اعتراف کرلیا کہ سرمایہ کار پاکستان نہیں آ رہے ہیں ہمیں نئی صلاحیتوں کی ضرورت ہے۔
احسن اقبال نے کہا کہ دنیا کی چھ ٹیکنالوجی ہر شعبے کو تبدیل کر رہی ہیں۔ جو خود کو ان کے مطابق نہیں ڈھالے گا وہ صفحہ ہستی سے مٹ جائے گا۔ پیداوار بڑھانے کیلیے ہمیں ٹیکنالوجی کا استعمال کرنا ہوگا۔
ان کا کہنا تھا کہ پاکستان اب بھی دنیا کی 10 بڑے زرعی ممالک میں شامل ہے لیکن ملک میں سرمایہ کاری کے وسائل موجود نہیں ہیں۔ ہمیں نئی صلاحیتیوں کی ضرورت ہے۔ یہ وقت کا تقاضا ہے کہ ہم ٹیکنالوجی کو استعمال کریں اور کچھ بریک تھرو لے کر آئیں۔
وفاقی وزیر نے مزید کہا کہ دودھ کے سیکٹر میں ہمارے ملک کا شمار دنیا کے پانچویں نمبر پر ہوتا ہے۔ آٹا، چاول، کپاس کوئی شعبہ اٹھا لیں ہم پہلے 10 بڑے پیداواری ممالک میں شامل ہیں۔
احسن اقبال نے کہا کہ آج کچھ لوگ شور مچاتے ہیں۔ یہ حکومت سازش سے نہیں بلکہ عدم اعتماد کی ووٹنگ سے آئی ہے۔ پاکستان اگر 75 سال کے بعد بھی اس مقام پر کھڑا ہے تو اس کی وجہ سیاسی عدم استحکام ہے۔ ملک کو آئندہ 25 سالوں میں دنیا کی بہترین فہرست میں لانے کی کوشش کرنا ہوگی۔
انہوں نے مزید کہا کہ پاکستان اپنے نوجوانوں کی وجہ سے پہچانا جاتا ہے۔ یہ وقت ہے کہ پوری قوم ملک کی معیشت کے مفادات کیلیے یکساں ہو جائے۔ قومی اتفاق رائے پیدا کرنا بہت ضروری ہے۔
