اسلام آباد: علامہ اقبال اوپن یونیورسٹی نے صحافیوں کی تعلیمی قابلیت کو بڑھانے کے لیے شارٹ کورسز شروع کرنے کا اعلان کردیا۔
علامہ اقبال اوپن یونیورسٹی کی جانب سے آج جاری ہونے پریس ریلیز کے مطابق میڈیا انڈسٹری کے نامور لوگ شارٹ کورسز میں طلبہ کی رہنمائی فرمائیں گے اور ان کو کامیابی کے طریقے بھی بتائیں گے۔
یونیورسٹی اعلامیے کے مطابق یہ شارٹ کورس خاص طور پر اُن لوگوں کے لیے متعارف جائے گا جو پہلے سے صحافی ہیں اور وقت کی قلت کے باعث تعلیم پر توجہ نہیں دے پاتے۔
مزید پڑھیں: علامہ اقبال اوپن یونیورسٹی کا فاٹا،بلوچستان کےطلبا کومفت تعلیم فراہم کرنےکا اعلان
شارٹ کورس کا دورانیہ تین ماہ ہوگا جس کے دوران ماہر اساتذہ کی جانب سے طالب علموں کو اسکرپٹ رائٹنگ، پروڈکشن، ویڈیو گرافی اور ڈاکومینٹری کے مضامین پڑھائے جائیں گے۔
ذرائع کے مطابق شارٹ کورس کے لیے جب داخلے شروع ہوں گے تو علامہ اقبال اوپن یونیورسٹی کی ویب سائٹ، فیس بک پر اعلان کیا جائے گا جس کا فارم آن لائن بھی بھرا جاسکے گا علاوہ ازیں ہیڈ آفس یا زونل آفس سے بھی داخلہ فارم وصول کیے جاسکیں گے۔
واضح رہے کہ علامہ اقبال اوپن یونیورسٹی کی جانب سے قبل ازیں جیل کے قیدیوں کو بھی مفت تعلیم دینے کا سلسلہ شروع کیا گیا جو کامیابی سے جاری ہے علاوہ ازیں گزشتہ برس انتظامیہ نے خواجہ سراؤں کو بھی مفت تعلیم اور ڈگری کا سلسلہ شروع کیا۔
