ایئر چیف مارشل ظہیر احمد بابر سدھو نے اسپیکر قومی اسمبلی ایاز صادق کے نام اظہار تشکر کا خط لکھا جس میں ان کے پارلیمانی کردار کی تعریف کی۔
ایئر چیف مارشل ظہیر احمد بابر سدھو نے اپنے جوابی خط میں لکھا کہ بھارتی جارحیت پر قومی یکجہتی قائم کرنے میں اسپیکر قومی اسمبلی ایاز صادق کا کردار قابل ستائش ہے، پارلیمانی قیادت کے قومی اتحاد کے مظاہرے پر پاک فضائیہ شکر گزار ہے۔
ظہیر احمد بابر سدھو نے لکھا کہ قومی اسمبلی کے ارکان کی یکجہتی قابل فخر ہے، دشمن کو مؤثر جواب پر پارلیمانی قیادت کا خراجِ تحسین ناقابل فراموش ہے، پاک فضائیہ کی کامیابی رب کریم کی عنایت اور قومی اتحاد کا نتیجہ ہے۔
یہ بھی پڑھیں: ایئر چیف کی مدت ملازمت میں توسیع کی ایڈوائس صدر کو ارسال
انہوں نے لکھا کہ قومی اتحاد نے دشمن کے ناپاک عزائم خاک میں ملا دیے، قوم کی حمایت سے مسلح افواج ہر چیلنج سے نمٹنے کی بھرپور صلاحیت رکھتی ہیں، پاک فضائیہ ملکی سرحدوں کے دفاع کیلیے ہر وقت تیار ہے۔
ایئر چیف مارشل ظہیر احمد بابر سدھو نے قومی اہداف کی تکمیل کیلیے ہر ممکن تعاون جاری رکھنے کے عزم کا اظہار کیا۔ واضح رہے کہ اس سے قبل اسپیکر قومی اسمبلی نے بھارتی جارحیت کا منہ توڑ جواب دینے پر فیلڈ مارشل آرمی چیف جنرل عاصم منیر اور ایئر چیف مارچل کو خطوط لکھے تھے۔
