اسلام آباد : ایئرچیف مارشل مجاہدانورخان نے کہا 27فروری کو دشمن کیخلاف آپریشن سوفٹ ریٹارٹ ہمیشہ یادرکھا جائے گا، دشمن کو آئندہ کسی بھی جارحیت کا جواب پہلے سے زیادہ سخت دیاجائےگا۔
تفصیلات کے مطابق ایئرچیف مارشل مجاہدانورخان نے 264ویں ایئراسٹاف پریزنٹیشن کے شرکا سے خطاب کرتے ہوئے کہا 27فروری کو دشمن کیخلاف کارروائی آپریشن سوفٹ ریٹارٹ یادرکھی جائے گی ، پاک فضائیہ نے 27 فروری کودشمن کیخلاف بھرپورجوابی کارروائی کی، ہم اللہ تعالیٰ کے حضور سجدہ شکر بجا لاتے ہیں کہ اللہ نے ہمیں قوم کی توقعات پر پورا اترنے کا موقع فراہم کیا۔
ایئر چیف کا کہنا تھا ہم حالیہ پاک بھارت کشیدگی کے دورا ن دشمن کی جارحیت کا بروقت اور بھرپور جواب دینے میں کامیاب رہے، بروقت کارروائی عزم و حوصلے اور جواب دینے کی اہلیت کی مثال ہے۔
مارشل مجاہدانورخان نے کہا پاک فضائیہ کےتمام افراد کو سلام پیش کرتا ہوں، جو ان مشکل حالات میں فارورڈ آپریٹنگ بیسز پر اپنی ذمہ داریاں مثالی عزم و حوصلے ، استقامت اور بہادری سے سرانجام دے رہے ہیں۔
ایئر چیف نے اس عزم کا اظہار کیا کہ آئندہ بھی دشمن کی جانب سے کسی قسم کی جارحیت کا جواب پہلے سے بھی زیادہ سخت انداز سے دیا جائے گا۔
اس تقریب کے اختتام پر ائیر چیف نے مختلف شعبہ جات میں نمایاں کارکردگی کا مظاہرہ کرنے والے بیسز میں ٹرافیاں تقسیم کیں۔ ٹریننگ اور فلائٹ سیفٹی میں بہترین کارکردگی کی ٹرافیاں پی اے ایف بیس شہباز کو دی گئیں جب کہ پی اے ایف بیس مصحف اسٹرونگ مین ٹرافی کا حقدار ٹھہرا، گراؤنڈ سیفٹی ٹرافی پی اے ایف بیس پشاور کو عطا کی گئی۔
پاک فضائیہ میں ہر تین ماہ بعد آپریشنل تیاریوں کا جائزہ لینے کے لئے ائیر سٹاف پریزینٹییشن منعقد کی جاتی ہے، جس میں پرنسپل اسٹاف افسران کے علاوہ فیلڈ کمانڈرز اور ائیر مین شرکت کرتے ہیں۔
یاد رہے پاک فضائیہ کے سربراہ مجاہد انور خان نے پاک بھارت کشیدگی کے تناظر میں کہا تھا کہ دشمن کی جارحیت کا بھرپور جواب دینے کے لیے ہمہ وقت تیار ہیں اور دشمن کو تنبیہہ کی کہ اگر اس کی طرف سے کوئی جارحیت کی گئی تو یاد رکھے کہ پاک فضائیہ بھرپور جواب دے گی۔
مزید پڑھیں : دشمن کی جارحیت کا بھرپور جواب دینے کے لیے ہمہ وقت تیار ہیں: ایئر چیف
واضح رہے 27 فروری کو پاکستانی شاہینوں نے جوابی کارروائی میں دو بھارتی مگ 21 طیارے مار گرائے تھے اور بھارتی پائلٹ کو بھی گرفتار کرلیا تھا، بعد ازاں جذبہ خیر سگالی کے تحت گرفتار پائلٹ کو بھارت کے حوالے کر دیا تھا۔
جس کے بعد مودی سرکار، بھارتی فوج اور بھارتی میڈیا ڈھٹائی سے لائن آف کنٹرول پر پاکستانی ایف سولہ طیارہ مار گرانے کا دعویٰ کرتے رہے تھے۔
بھارت نےڈی جی آئی ایس پی آر میجرجنرل آصف غفور نے بھی ایف 16طیارہ گرانے کا بھارتی دعویٰ مسترد کرتے ہوئے کہا تھا بھارتی طیارے گرانے کی کارروائی میں جے ایف17 تھنڈراستعمال کیا گیا۔
