اسلام آباد : پاک فضائیہ کے آپریشنل ایئر بیس پر خطے کی سب سے بڑی فضائی جنگی مشقیں ‘انڈس شیلڈ2023’ جاری ہے، جو پاکستان کی فضائی حدود کے تحفظ کے عزم کا منہ بولتا ثبوت ہے۔
تفصیلات کے مطابق پاک فضائیہ کے آپریشنل ایئر بیس پر 14 ملکی فضائی مشق انڈس شیلڈ 2023 جاری ہے، پاک فضائیہ جدید فضائی جنگی حکمت عملیوں کو فروغ دیکر عالمی توجہ کا مرکز بن گیا۔
ترجمان پاک فضائیہ کی جانب سے کہا گیا ہے کہ انڈس شیلڈ بڑی فضائی جنگی مشقوں میں سے ایک ہونے کی بدولت نمایاں حیثیت کی حامل ہیں اور ملک کی فضائی صلاحیتوں کو فروغ دینے کی جانب ایک اہم سنگ میل ہے۔
ترجمان نے بتایا کہ مشق میں دنیا کی صف اول کی فضائی افواج کے پائلٹس سمیت گراؤنڈ عملہ اور ایئر ڈیفنس کنٹرولرز سمیت جدید لڑاکا طیاروں نے شرکت کی۔
پاک فضائیہ کے مطابق انڈس شیلڈ فضائی افواج کو پیشہ ورانہ صلاحیتوں کا مظاہرہ کرنے کیلئےپلیٹ فارم فراہم کر رہی ہے، فضائی مشق میں پاکستان، ترکیہ، سعودی عرب، قطر، متحدہ عرب امارات ، مصر، عمان، بحرین، آذربائیجان، انڈونیشیا، مراکش، ازبکستان، چین اور ہنگری کی فضائی افواج شریک ہیں۔
ترجمان کا کہنا تھا کہ مشق کے ذریعے تکنیکی ترقی، جدت کے فروغ، فضائی جنگ کی حکمت عملیوں کو جانچنے کے کردارمیں توثیق ہوگی جبکہ عصر حاضر کے فضائی دفاعی چیلنجوں سے نمٹنے میں پاک فضائیہ کے اہم کردار کی بھی توثیق ہے۔
پاک فضائیہ کے ترجمان نے کہا کہ انڈس شیلڈ مشترکہ مقاصد کے حصول کیلئے شریک ممالک کے باہمی شراکت داری کے عزم کا ثبوت ہے، فضائی مشق خطرات کے پیش نظر فضائی جنگ کے نئے ابھرتے ہوئے محرکات کا احاطہ کرے گی۔
مشق انڈس شیلڈ کے باعث بین الاقوامی برادری کی توجہ پاکستان کی جانب مبذول کرائی ، مشق شریک ممالک کی فضائی افواج کے مابین تعاون کو مستحکم کرنے کا بہترین موقع فراہم کررہی ہے۔
ترجمان کے مطابق مشق مشترکہ چیلنجز کا سامنا کرنے کے لیے شریک فضائی افواج کے مابین باہمی تعاون کو فروغ دے گی، انڈس شیلڈ پاک فضائیہ کی جانب سے پاکستان کی فضائی حدود کے تحفظ کے عزم کا منہ بولتا ثبوت ہے۔
