بھارتی ڈائریکٹوریٹ جنرل آف سول ایوی ایشن نے فوری طور پر ایئرانڈیا کے تین عہدیداروں کو فوری طور پر نکالنے کا حکم دیا ہے۔
ایوی ایشن سیفٹی پر نظر رکھنے والی ڈائریکٹوریٹ جنرل آف سول ایوی ایشن (ڈی جی سی اے) نے سنگین غلطیوں کی نشاندہی ہونے کے بعد ایئر انڈیا کو تین عہدیداروں کو روسٹرنگ اور عملے کے شیڈولنگ سے منسلک تمام کرداروں اور ذمہ داریوں سے ہٹانے کی ہدایت کی ہے۔
20 جون کو جاری حکم نامے میں ڈی جی سی اے نے ٹاٹا گروپ کی ملکیت ایئرلائن سے کہا کہ وہ ان تینوں اہلکاروں کے خلاف بلاتاخیر کارروائی کا آغاز کرے۔
بھارت :مسافر طیارہ حادثے میں 241 مسافر ہلاک
ایئرانڈیا نے یہ حکم نامہ سامنے آنے کے بعد جاری بیان میں کہا کہ کمپنی نے ایوی ایشن واچ ڈاگ کے حکم پر عمل کیا ہے۔
ایئرلائن نے مزید بتایا کہ کمپنی کے چیف آپریشنز آفیسر ایئرانڈیا کے انٹیگریٹڈ آپریشنز کنٹرول سینٹر کی براہ راست نگرانی کریں گے، ایئرانڈیا اس بات کو یقینی بنانے کے لیے پُرعزم ہے کہ حفاظتی پروٹوکول اور معیاری طریقوں کی مکمل پابندی ہو۔
ڈی جی سی اے کے حکم نامے میں کہا گیا ہے کہ ایئرانڈیا کے عملے کے شیڈولنگ میں بارہا اور سنگین خلاف ورزیاں پائی گئیں، پرواز کے عملے کے شیڈول اور آپریٹ ہونے کے حوالے سے بھی کوتاہی کا انکشاف سامنے آیا ہے۔
