اسلام آباد: بلوچستان نیشنل پارٹی (بی این پی) کے سربراہ سردار اختر مینگل نے ملکی بقا اور بلوچستان کی ترقی کیلیے وزیر اعظم شہباز شریف پر مکمل اعتماد کا اظہار کر دیا۔
وزیر اعظم شہباز شریف سے سردار اختر مینگل نے ملاقات کی اور اس پر مکمل اعتماد کا اظہار کرتے ہوئے کہا کہ وزیر اعظم نے بلوچستان کے نوجوانوں کی ترقی کو اپنی اولین ترجیح بنایا اور سیلاب کے دوران صوبے کے علاقوں کا دورہ کیا۔
اختر مینگل نے کہا کہ شہباز شریف نے سیلاب متاثرہ بلوچوں کا درد بانٹا جو آج سے پہلے کبھی نہ ہوا، انہوں نے معاشی مشکلات اور قدرتی آفات کے باوجود معیشت کو مستحکم کیا۔
ملاقات کے دوران وزیراعظم کا کہنا تھا کہ پاکستان کی ترقی بلوچستان کی ترقی سے مشروط ہے، باصلاحیت بلوچ نوجوان پاکستان کا قیمتی اثاثہ ہیں۔
شہباز شریف نے کہا کہ بلوچ نوجوان کی ترقی حکومت کی اولین ترجیح ہے، گوادر کے لوگوں کو بین الاقوامی معیار کی سہولیات کیلیے کوشاں ہوں۔
