اسلام آباد : نیب کی کمبائنڈ انویسٹی گیشن ٹیم نے القادر یونیورسٹی ٹرسٹ کیس میں چیئرمین پی ٹی آئی عمران خان کو سوالنامہ دے دیا۔
تفصیلات کے مطابق القادر یونیورسٹی ٹرسٹ کیس، قومی احتساب بیورو نیب نے چیئرمین پی ٹی آئی عمران خان کو شامل تفتیش کرلیا۔
نیب کی کمبائنڈ انویسٹی گیشن ٹیم نے عمران خان کو سوالنامہ دے دیا ، جس میں پوچھا گیا ہے کہ دسمبر2019میں برطانیہ سے غیرقانونی رقم کی واپسی کی منظوری کیلئے سمری کیوں تیار کرائی؟
سوالنامے میں پوچھا گیا کہ دسمبر2019میں برطانیہ سےرقم کی واپسی کو سرنڈر کرنے کی منظوری کیوں دی ؟ اور ملزمان سےبدلےمیں القادریونیورسٹی کی زمین اوردیگرمالی فائدے کیوں لیے ؟
نیب نے سوال کیا کہ اعلیٰ ترین عوامی عہدے پر بیٹھ کر اختیارات کاناجائز استعمال کیوں کیا ؟ اختیارات کا ناجائزاستعمال کرکے ملزمان سے مالی فائدے کیوں حاصل کئے؟
سوالنامے کے مطابق برطانیہ سے غیر قانونی رقم ملزمان کو واپس کرکے مجرمانہ عمل کیوں کیا؟ اور برطانوی نیشنل کرائم ایجنسی سے خط و کتابت اور ایسٹ ریکوری یونٹ کی سمری کو خفیہ کیوں رکھا گیا ؟
گذشتہ روز احتساب عدالت نے سابق وزیراعظم عمران خان کا القادر ٹرسٹ کیس میں 8 روزہ جسمانی ریمانڈ منظور کرلیا تھا، نیب نے 14 روزہ ریمانڈ کی استدعا کی تھی۔
