اب ’ایکس‘ یعنی ٹوئٹر صارفین کو اس کے استعمال کے لیے ہر سال ایک مقررہ رقم ادا کرنا ہوگی، بصورت دیگر صارفین اس سہولت سے فائدہ نہیں اٹھا سکیں گے۔
تفصیلات کے مطابق اب ’ایکس‘ یعنی ٹوئٹر صارفین کو اس کے استعمال کے لیے ہر سال 1 ڈالر کی سبسکرپشن رقم ادا کرنا ہوگی، گزشتہ ماہ ستمبر میں ایلون مسک نے عندیہ دیا تھا کہ تمام صارفین کو ایکس کے استعمال پر معقول فیس ادا کرنا ہوگی جس پر عمل درآمد کا آغاز کردیا گیا ہے۔
غیرملکی خبر رساں ادارے کی رپورٹ کے مطابق ایلون مسک نے اس حوالے سے دلیل دیتے ہوئے کہا ہے کہ ایسا کرنے سے’ایکس‘ پر موجود جعلی اور خودکار بوٹ اکاؤنٹ کو بلاک کر دے گا، اس نئے پروگرام کا مقصد سوشل پلیٹ فارم میں چیٹ بوٹس کی بھرمار کو روکنا ہے۔
ایکس کمپنی نے ایک پوسٹ میں کہا ہے کہ ’’17 اکتوبر، 2023 سے ہم نے ”نوٹ اے بوٹ“ کی آزمائش شروع کر دی ہے جو دو ممالک میں نئے صارفین کے لئے سبسکرپشن کا ایک نیا طریقہ ہے، یہ نیا ٹیسٹ اسپام، ہمارے پلیٹ فارم کی ہیرا پھیری اور بوٹ سرگرمی کو کم کرنے کے لیے پہلے سے اہم کوششوں کو تقویت دینے کیلئے تیار کیا گیا تھا۔
بلومبرگ کی رپورٹ کے مطابق ایکس پر ناٹ اے بوٹ فیچر کی جانچ فی الحال نیوزی لینڈ اور فلپائن میں شروع کی گئی ہے۔ جہاں نئے ’ایکس‘صارفین سالانہ فیس ادا کیے بغیر ’ایکس‘استعمال نہیں کر سکتے۔ اس فیس کے بغیر آپ ’ایکس‘ پر پوسٹ، لائک، تبصرہ اور بک مارک بھی نہیں کرسکیں گے۔
واضح رہے کہ جب سے ایلون مسک نے ٹوئٹر حاصل کیا ہے وہ اس کے لئے آمدنی کے نئے طریقے تلاش کر رہے ہیں۔ بلومبرگ کی رپورٹ کے مطابق حصول کے بعد سے ایلون مسک کو ایکس کے لیے ہر سال تقریباً 1.2 بلین کا سود ادا کرنا پڑتا ہے۔
