پشاور : وزیراعلیٰ کےپی علی امین گنڈا پور نے گورنر کے پی فیصل کریم کنڈی کو وارننگ دیتے ہوئے کہا کہ اپنی اوقات میں رہو، گورنرہاؤس کو ورثہ قرار دے کر دو کمروں میں منتقل کردوں گا۔
تفصیلات کے مطابق وزیراعلیٰ کے پی علی امین گنڈا پور نے گورنر کے پی فیصل کریم کنڈی کے بیان پر ردعمل دیتے ہوئے کہا کہ وارننگ دے رہاہوں گورنرکاآئینی عہدہ ہے،سیاسی باتوں سے پرہیزکریں،اس بار جواب نہیں دے رہا اگر جواب دیا تو پھرشکوہ نہیں کرنا۔
علی امین کا کہنا تھا کہ اس بار چھوڑ رہا ہوں،دوبارہ نہیں چھوڑوں گا، آپ کی گاڑی کا تیل میرے بجٹ سے جاتا ہے، گورنر ہاؤس آپ کی ملکیت نہیں ہے، ایسانہ ہو میں اسے عوام کیلئے کھول دوں۔
وزیراعلیٰ کے پی وارننگ دی کہ گورنرہاؤس کو ورثہ قرار دے کرعجائب گھر بنادوں گا، دو کمروں میں منتقل کردوں گا، اس بارمعاف کر رہا ہوں دوبارہ معاف نہیں کروں گا۔
ان کا کہنا تھا کہ اگردوبارہ بیان دیاتوکہوں گااس کوہٹاؤ یہاں سے، اپنی اوقات میں رہو، تم گورنر ہو سیاست تمہارا کام نہیں ہے۔
وزیراعلیٰ کے پی نے مزید کہا کہ میں کھڑا ہوگیا تو تم ایک لیٹر پرنوٹیفائی ہوئے ہو،ایک لیٹرپرڈی نوٹیفائی ہوجاؤ گے، تمہاری یہی حیثیت ہے صرف ایک لیٹر، تم غیرقانونی گورنر ہو،اس بار چھوڑ رہا ہوں، آئندہ نہیں چھوڑوں گا۔
یاد رہے گورنر خبیر پختونخوا فیصل کریم کنڈی نے وزیر اعلیٰ کے گورنر ہاؤس پر قبضہ سے متعلق بیان پر کہا تھا کہ گورنر ہاؤس پر قبضہ کرنا ہے تو آ جاؤ خود کو آزما لو، اسلام آباد میں بھاگنے کیلیے ہائی وے مل گیا تھا لیکن یہاں نہیں ملے گا۔
انہوں نے کہا تھا کہ گورنر ہاؤس کی طرف دیکھا تو سڑکوں پر گھسیٹوں گا، علی امین کو باور کرواتا ہوں بد معاشوں سے ڈیل کرنا مجھے آتا ہے۔
