پشاور: خیبر پختون خوا کے نامزد وزیر اعلیٰ علی امین گنڈاپور نے کہا ہے کہ ’ساڈا حق ایتھے رکھ‘ ہی نعرہ میرا ہے۔
تفصیلات کے مطابق آج پیر کو پشاور ہائیکورٹ کے باہر گفتگو کرتے ہوئے پی ٹی آئی رہنما علی امین گنڈاپور نے کہا کہ پارٹی شمولیت کے لیے لیگل ٹیم معاملات دیکھ رہی ہے، حتمی فیصلہ بانی پی ٹی آئی کریں گے۔
انھوں نے کہا ’ساڈا حق ایتھے رکھ‘ ہی میرا نعرہ ہے، وفاق سے خیرات نہیں اپنا حصہ مانگیں گے، خیبر پختون خوا کے حقوق وفاق کو ہر حال میں دینا ہوں گے۔ علی امین گنڈاپور کا کہنا تھا صوبے میں معاشی بحران ختم کرنے کے لیے اقدامات کریں گے، 2 سال میں معاشی مسائل بہت زیادہ ہو گئے ہیں، ان چیلنجز سے نمٹنے کی کوشش کریں گے۔
نامزد وزیر اعلیٰ نے وعدہ کیا کہ نوجوانوں کو روزگار اور کاروبار دیں گے، نوجوانوں کو اسکلز ٹریننگ دے کر اپنا کاروبار شروع کرائیں گے، جب کہ خواتین کے شرعی مسائل کے حل کے لیے انھیں مفت قانونی معاونت دی جائے گی۔
