سرگودھا : انسداد دہشت گردی کی خصوصی عدالت نے علی امین گنڈا پورمقدمے سے دہشت گردی کی دفعات ختم کردیں، پی ٹی آئی رہنما کو ایک دن کے ریمانڈ پر جیل بھیج دیا۔
تفصیلات کے مطابق سرگودھا کی انسداد دہشت گردی کی خصوصی عدالت نے محفوظ کیا گیا فیصلہ سنادیا، عدالت نے علی امین گنڈا پورمقدمے سے دہشت گردی کی دفعات ختم کردیں۔
عدالت نے علی امین گنڈا پور کا مقدمہ بھکر کی عام عدالت میں منتقل کرنے کا حکم دیتے ہوئے کہا کہ پولیس ایک روزہ جسمانی ریمانڈ کے بعد ملزم کو بھکر عدالت میں پیش کرے۔
قبل ازیں انسداد دہشت گردی کی خصوصی عدالت میں علی امین گنڈا پور کے خلاف بھکر میں چیک پوسٹ حملہ کیس کی سماعت ہوئی۔پی ٹی آئی رہنما علی امین گنڈا پور کو 3 روزہ ریمانڈ کے بعد عدالت میں پیش کیا گیا۔
پولیس کی جانب سے علی امین گنڈا پور کے 14 روزہ جسمانی ریمانڈ کی استدعا کی گئی تھی۔ علی امین گنڈا پور کے وکیل نے استدعا کرتے ہوئے کہا کہ کیس عام عدالت میں منتقل کیا جائے۔
عدالت نے وکلا کے دلال سننے کے بعد فیصلہ محفوظ کرلیا، جو بعد میں سنا دیا گیا۔ واضح رہے کہ پی ٹی آئی رہنما علی امین گنڈا پور کے خلاف ضلع بھکر میں مقدمہ درج ہے۔
بعد ازاں پولیس علی امین گنڈا پور کولے کر بھکر کے لیے روانہ ہوگئی اس موقع پرعدالت کے باہر پی ٹی آئی کارکنوں نے شدید نعرے بازی کی۔
