پاکستان کے معروف اداکار علی رحمان خان نے دیر سے شادی کرنے پر مردوں کو درپیش معاشرتی دباؤ ست معتلق رائے کا اظہار کیا ہے۔
پاکستان کے معروف اداکار علی رحمان خان ایک مشہور اور باصلاحیت پاکستانی اداکار ہیں، وہ اپنی دلکش شخصیت اور ان کی شاندار اداکاری کی صلاحیتوں کی وجہ سے پسند کیے جاتے ہیں۔
اداکار نے حال ہی میں اے آر وائی ڈیجیٹل پر نشر ہونے والی اپنی ہٹ ڈرامہ سیریل ’نور جہاں‘ میں اپنی اداکاری کے جوہر دکھائے تھے، علی رحمان نے حال ہی میں ایک ویب شو میں بطور مہمان شرکت کی جہاں اُنہوں نے شادی نہ کرنے پر معاشرتی دباؤ سے متعلق بات کی۔
یاسر حسین مجھ سے بہتر اداکار ہیں، علی رحمان خان (arynews.tv)
علی رحمان نے کہا کہ میرے خیال میں شادی نہ کرنے پر مردوں کو بھی معاشرتی دباؤ کا سامنا کرنا پڑتا ہے لیکن میرے والدین نے مجھے پر کبھی ایسا کوئی دباؤ نہیں ڈالا، ہاں میری شادی میں کافی دیر ہو چُکی ہے لیکن جب بھی شادی کروں گا تو اپنی مرضی سے کروں گا۔
اداکار علی رحمان خان کا کہنا تھا کہ ہمارا معاشرہ خصوصاً آنٹیاں شادی کے حوالے سے بہت دباؤ ڈالتی ہیں، وہ ہمیشہ شادی کے بارے میں سوال پوچھتی ہیں لیکن میرا خیال ہے کہ شادی کرنے میں دیر ہوجائے تو خواتین کو مردوں کے مقابلے میں زیادہ دباؤ کا سامنا کرنا پڑتا ہے۔
اُنہوں نے کہا کہ شادی ایک عظیم رشتہ ہے تو سب کو شادی کرنی چاہیے لیکن اس وقت کرنی چاہیے جب انسان کو خود یہ یقین ہو کہ وہ شادی کرنے کے لیے تیار ہے اور ذمہ دار ہوگیا ہے۔
اسلام آباد میں پیدا ہونے والے علی رحمان خان نے اداکاری کا آغاز 2012 کے مزاحیہ ڈرامے گول چکر سے کیا، اس کے بعد رومانوی ڈرامہ سیریل رشتے کچھ ادھورے سے میں اداکاری کی، جس سے انھیں شہرت ملی، انہوں نے فلموں میں بھی اداکاری کی ہے جن میں جانان (2016)، پرچی (2018) اور ہیر مان جا (2019) شامل ہیں۔۔
