کراچی : وفاقی وزیر علی حیدر زیدی نے کہا ہے کہ مریم نواز نے اپنی جماعت کو تباہ کردیا، ان کے پاس کہنے کو کچھ نہیں رہا، جو حشر زرداری نے پیپلز پارٹی کا کیا وہی مریم بھی کررہی ہیں۔
ان خیالات کا اظہار انہوں نے کراچی میں میڈیا سے گفتگو کرتے ہوئے کیا، انہوں نے کہا کہ ویڈیو اسکینڈل کے باجود ان سب معاملات کے باوجود بھی فیصلہ ن لیگ کےخلاف آیا ہے۔
کتنا خطرناک ثبوت تھا کہ یہ جو مرضی کرلیں فیصلہ ان کے خلاف ہی آنا تھا، بیان حلفی بھی آگیا اس کے بعد بھی مریم الٹے سیدھے بیانات دے رہی ہیں۔
ان کا طرز حکومت یہی رہا ہے لوٹ، کھاؤ اور لوگوں کو خرید لو، اداروں میں اپنے لوگوں کو بھرتی کرو، عوام کو نظر آگیا ہے کہ یہ لوگ ماضی میں کیا کرتے رہے ہیں۔
علی زیدی نے کہا کہ سسیلین مافیا کا بھی یہی طریقہ کار تھا جو آج ن لیگ کا ہے، یہ ایک ہی چیز بار بار کرکے نتیجہ مختلف سوچتے ہیں ،ان کے پاس کہنے کو کچھ نہیں رہا،سب کچھ واضح ہوچکا ہے۔
وفاقی وزیر نے کہا کہ جو زرداری نے پیپلزپارٹی کےساتھ کیا مریم اس سے بھی زیادہ ن لیگ کےساتھ کررہی ہیں ،مریم نواز نے اپنی جماعت تباہ کردی ہے۔
