لاہور : آل پاکستان انجمن تاجران نے آئندہ مالی سال کے بجٹ کو مسترد کرتے ہوئے ود ہولڈنگ ٹیکس سمیت تمام ٹیکسز کی شرح میں کمی کا مطالبہ کردیا۔
تفصیلات کے مطابق آل پاکستان انجمن تاجران کے صدر خالد پرویز نے اپنے دفتر میں میڈیا سے گفتگو کرتے ہوئے کہا ہے کہ حکومت بجٹ میں عوام کو ریلیف دینے میں مکمل طور پر ناکام ہوچکی ہے۔
انہوں نے مزید کہا کہ بجٹ سے پہلے حکومتی نمائندوں نے تاجر برادری کے ساتھ بجٹ کے حوالے سے کسی قسم کی مشاورت نہیں کی۔
صدر انجمن تاجر نے کہا کہ موجودہ حکومت نے آئندہ مالی سال کا بجٹ عالمی بینک اور آئی ایم ایف کی خواہشات کو مدنظر رکھتے ہوئے بنایا ہے، جس کا بنیادی مقصد عوام کا معاشی استحصال کرنا ہے۔
انہوں نے حکومت سے مطالبہ کیا کہ عوام کو ریلیف دینے کے لیے فوری طور پر تاجروں کے ساتھ مشاورت کر کے بجٹ میں عائد ٹیکسز میں کمی کا اعلان کیا جائے ورنہ تاجر برادری سخت احتجاج کا راستہ اختیار کرے گی۔
