لاہور : ملک بھر میں یوٹیلیٹی اسٹورز کارپوریشنز کا کمپیوٹر سسٹم بیٹھ گیا جس کی وجہ سے خریداری کے لئے آنے والے شہریوں کی لمبی قطاریں لگ گئیں۔
تفصیلات کے مطابق ملک بھر کے یوٹیلیٹی اسٹورز کا سرور ڈاؤن ہونے کے باعث اسٹورز پر آپریشن معطل ہوگیا جس سے شہریوں کو شدید مشکلات کا سامنا کرنا پڑا۔
اس حوالے سے یوٹیلیٹی اسٹورز حکام کا کہنا ہے کہ سبسڈی کو دو حصوں میں تقسیم کرنے کے باعث سسٹم ڈاؤن ہوا، سرور ڈاؤن ہونے کے باعث اسٹورز پر آٹے کی انٹری ممکن نہیں رہی۔
حکام کے مطابق سسٹم ڈاؤن ہونے کے باعث یوٹیلیٹی اسٹورز میں شہریوں کو اشیاء خورد و نوش کی فراہمی اور خرید و فروخت ممکن نہیں ہے۔
یوٹیلیٹی اسٹورز حکام کا کہنا ہے کہ آج سے ملک بھر کے یوٹیلیٹی اسٹورز پرشہریوں کے لیے آٹے کا 10 کلوکا تھیلا 684 روپے میں دستیاب ہے۔
حکام کے مطابق اس کے علاوہ 400 روپے میں 10کلو سستے آٹے کا تھیلا صرف بینظیرانکم سپورٹ پروگرام کارڈ رکھنے والوں کو ہی دستیاب ہے۔
نئےسال پر عوام کو تحفہ، یوٹیلیٹی اسٹورز پر اشیاء کی قیمتیں بڑھ گئیں
واضح رہے کہ وزیراعظم شہباز شریف کے پیکیج کے تحت نیا سال شروع ہوتے ہی مہنگائی کا بھی ایک نیا دور شروع ہوگیا ہے اور یکم جنوری سے یوٹیلیٹی اسٹور پر آٹا، چینی، تیل، گھی سمیت دیگر اشیائے ضروریہ کی قیمتوں میں اضافہ کردیا گیا جبکہ ماہانہ خریداری کی حد میں بھی کمی کردی گئی ہے۔
