کراچی: لاہور ایئرپورٹ پر پاکستانی نژاد برطانوی شہری پر ایف آئی اے اہلکار کی جانب سے مبینہ تشدد کا معاملہ سامنے آیا ہے۔
تفصیلات کے مطابق دبئی سے لاہور آنے والے پاکستانی نژاد برطانوی شہری ملک بلال نے سول ایوی ایشن اتھارٹی کو تشدد کے حوالے سے ایک تحریری شکایت کی ہے، جس پر اے ایس آئی بلال کو معطل کر دیا گیا ہے۔
مسافر نے کہا کہ امیگریشن کاؤنٹر پر موجود اے ایس آئی نے ان سے ای ویزا طلب کیا تھا، تاہم موبائل فون کی بیٹری ختم ہو جانے کے باعث انھوں نے اہلکار کو پاسپورٹ نمبر سے ویزا چیک کرنے کو کہا، جس پر اہلکار کی جانب سے ای ویزا دکھانے پر اصرار کیا گیا تو اس پر تلخ کلامی ہو گئی۔
برطانوی شہری نے دعویٰ کیا ہے کہ اے ایس آئی نے ان کے چہرے اور کان پر مکے مارے، جس کی وجہ سے ان کے کان سے خون نکلنے لگا تھا، ملک بلال نے مطالبہ کیا ہے کہ واقعے سے متعلق تحقیقات کے بعد اے ایس آئی کے خلاف کارروائی کی جائے۔
ترجمان سی اے اے نے اس سلسلے میں بتایا کہ ڈی جی سی اے اے نے واقعے کی انکوائری رپورٹ طلب کی ہے، اگر زد و کوب کرنے کی تصدیق ہو گئی تو اہلکار کے خلاف کارروائی عمل میں لائی جائے گی۔
دوسری جانب ڈائریکٹر ایف آئی اے لاہور سرفراز ورک نے واقعے کا نوٹس لیتے ہوئے امیگریشن کاؤنٹر کے اے ایس آئی بلال کو معطل کر دیا ہے، انھوں نے کہا ڈپٹی ڈائریکٹر کی سربراہی میں ایک انکوائری ٹیم تشکیل دے دی گئی ہے، اور اے ایس آئی بلال سے واقعے کا تحریری جواب بھی طلب کر لیا گیا ہے، سرفراز ورک کا کہنا تھا کہ کسی شہری کے ساتھ زیادتی برداشت نہیں کی جائے گی۔
