مظفرآباد: امریکی سینیٹرز نے مطالبہ کیا ہے کہ بھارت فوری کرفیو ختم کرکے تمام قیدیوں کو رہا کرے، مسئلہ کشمیر کے مستقل دیرپا حل کے لیے کوششیں کرنی چاہئے۔
تفصیلات کے مطابق امریکی ارکان سینیٹ کرس وان ہولین، میگی حسن نے مظفرآباد کا دورہ کیا، دفتر خارجہ کے مطابق امریکی ناظم الامور پال جونز بھی کانگریس کے وفد کے ہمراہ تھے، امریکی وفد کے دورے کا مقصد آزاد کشمیر کی صورت حال کا جائزہ لینا تھا۔
دفتر خارجہ کا کہنا ہے کہ میجر جنرل عامر نے امریکی وفد ایل او سی کی صورت حال سے آگاہ کیا، امریکی وفد نے آزاد کشمیر کے صدر اور وزیراعظم سے ملاقاتیں کیں۔
آزاد کشمیر قیادت نے کشمیریوں کی جدوجہد کو سپورٹ کرنے پر امریکی وفد کا شکریہ ادا کیا، آزاد کشمیر قیادت کا کہنا تھا کہ امریکی وفد مقبوضہ کشمیر کی صورت حال سے قیادت کو آگاہ کرے۔
مزید پڑھیں: امریکی سینیٹرکرس وین آج آزاد کشمیرکا دورہ کررہے ہیں
ترجمان دفتر خارجہ کا کہنا ہے کہ توقع ہے کہ امریکی وفد اپنے مشاہدے کو دنیا کو حقائق سے آگاہ کرے گا، امریکی وفد کو مقبوضہ کشمیر میں انسانی حقوق کی خلاف ورزیوں پر بریفنگ دی گئی۔
ترجمان دفتر خارجہ کے مطابق امریکی وفد کو بھارتی حکومت نے مقبوضہ کشمیر جانے سے روک دیا تھا، بھارتی حکومت نے مقبوضہ وادی کے حقائق دیکھنے سے امریکی وفد کو روکا، امریکی وفد کو آزاد کشمیر میں کہیں بھی جانے کی مکمل آزادی تھی۔
امریکی سینیٹر نے مقبوضۃ کشمیر کی صورت حال پر گہری تشویش کا اظہار کرتے ہوئے کہا کہ کشمیریوں کو مرضی کے مطابق فیصلے کا اختیار دیا جائے، کشمیریوں کے حوالے سے بھرپور آواز اٹھائیں گے۔
