واشنگٹن: کروناوائرس کی ویکسین تیار کرنے کے لیے امریکا نے ادویات بنانے والی کمپنی سے معاہدہ طے کرلیا۔
غیرملکی خبررساں ادارے کی رپورٹ کے مطابق ادویات بنانے والی امریکی کمپنی ’’جانسن اینڈ جانسن‘‘ اور حکام کے درمیان ویکسین کی تیاری کے لیے بڑا معاہدہ طے پاگیا، دونوں فریقین نے دست خط بھی کردیے۔
رپورٹ میں کہا گیا ہے کہ امریکی حکومت ’’نیو ویکسین کویڈ 19‘‘ کی تیاری کے لیے 450 ملین ڈالر کمپنی کو فراہم کرے گی۔ جانسن اینڈ جانسن کمپنی کو کسی بھی ویکسین کی تیاری کی مدد میں دی جانے والی یہ سب سے بڑی رقم ہوگی۔
اینٹی کرونا ویکسین کی تیاری جاری، جون تک متعارف کرادی جائے گی
امریکا اور کمپنی کے درمیان معاہدے پر دست خط 27 مارچ کو ہوئے۔
کمپنی کا کہنا ہے کہ ممکنہ طور پر ویکسین تیاری کے بعد رواں سال ستمبر میں آزمائش کے لیے پیش کی جائے گی۔ اور 2021 کے آغاز میں اسپتالوں میں استعمال کے لیے فراہم کی جاسکتی ہے۔
خیال رہے کہ مختلف ممالک میں کروناوائرس کی ویکسین کی تیاری کے لیے ماہرین اور سائنس دان سر جوڑے بیٹھے ہیں، تاہم اب تک کوئی مصدقہ دوا یا پھر علاج سامنے نہیں آیا۔ کئی ماہرین علاج دریافت کرنے کا دعویٰ بھی کرچکے ہیں لیکن عالمی ادارہ صحت نے تصدیق نہیں کی۔
