ممبئی: بالی وڈ کے میگا اسٹار امیتابھ بچن مشہور زمانہ شو ’کون بنے گا کروڑ پتی‘ کو الوداع کہتے ہوئے آبدیدہ ہوگئے۔
میڈیا رپورٹس کے مطابق حال ہی میں ’کون بنے گا کروڑ پتی‘ شو کے سیزن 15 کا آخری پرومو جاری کیا گیا جس کے اختتام پر امیتابھ بچن خصوصی پیغام دے رہے ہیں۔
خصوصی پیغام میں وہ لوگوں کو مخاطب کرتے ہوئے کہتے ہیں کہ اب میں جا رہا ہوں اور کل سے اسٹیج نہیں سجے گا، اپنوں سے یہ کہنے کیلیے کہ ’کل سے یہاں نہیں آ سکیں گے‘ بہت ہمت درکار ہوتی ہے۔
View this post on Instagram
مذکورہ ویڈیو کو سونی ٹی وی کے آفیشل اکاؤنٹ سے شیئر کیا گیا جس کے کیپشن میں لکھا ہے کہ ’امیتابھ جی شو کے فائنل میں اپنے جذبات کا اظہار کر رہے ہیں۔ ہنسی، محبت اور یادوں سے بھرا یہ منفرد سفر یاد رکھا جائے گا۔‘
اب تک یہ واضح نہیں ہو سکا کہ امیتابھ بچن نے شو کو ہمیشہ کیلیے الوداع کہہ دیا یا پھر وہ سیزن 15 کا اختتام ہونے پر خصوصی پیغام دے رہے ہیں۔
ویڈیو دیکھنے کے بعد میگا اسٹار کے زیادہ تر مداح تذبذب کا شکار ہیں جبکہ کچھ افسوس کا اظہار کر رہے ہیں۔
’کون بنے گا کروڑ پتی‘ شو بھارت میں پہلی بار 2000 میں نشر کیا گیا اور تب سے اب تک یہ کافی مقبول رہا ہے۔ میتابھ بچن روزِ اول سے شو کے میزبان ہیں۔
