اماراتی اور اطالوی حکام نے سائنسی تحقیقی پروگراموں کو مشترکہ طور پر انجام دینے کےلیے معاہدے پر دستخط کر دئیے۔
عرب میڈیا کے مطابق اماراتی ریاست دبئی میں مفاہمتی یاداشت پر دستخط کرنے کی ایک تقریب منعقد ہوئی جس میں اطالوی نیشنل کونسل فار ریسرچ کی صدر ماریہ چیارا کیروزا اور متحدہ عرب امارات کے انڈر سیکرٹری برائے معیشت عبداللہ الصالح نے مفاہمتی یاداشت پر دستخط کیے۔
غیرملکی میڈیا کا کہنا ہے کہ معاہدے کا مقصد مشترکہ سائنسی تحقیقی پروگراموں (جن میں قابل تجدید توانائی، ٹیکنالوجی، خوراک کی حفاظت، خلائی اور جدید زرعی ٹیکنالوجی شامل ہیں) کی حمایت کرنا ہے جو بہتر معیشت کو فروغ دے سکیں۔
اطالوی اور اماراتی حکام نے اس معاہدے کا مقصد دونوں ممالک کے فیکلٹی ممبران اور تعلیمی اداروں کے باہمی دوروں کا فروغ بھی بتایا گیا ہے۔
رپورٹ میں بتایا گیا ہے کہ اس تقریب میں امارات کے وزیر اقتصادیات عبداللہ بن طوق المری بھی موجود تھے۔
