کراچی: اے این ایف کامنشیات اسمگلنگ کیخلاف ملک بھر میں کریک ڈاؤن جاری ہے، 5 مختلف کارروائیوں کے دوران 37 کلو منشیات برآمد کرکے 3ملزمان کو حراست میں لے لیا گیا۔
اے آر وائی نیوز کے مطابق راولپنڈی میں کوریئر آفس میں برطانیہ سے بھیجے گئے پارسل سے 25 گرام ویڈ برآمد کرلی گئی جبکہ حیدرآباد میں واقع کوریئر آفس میں پارسل سے 10 کلو چرس برآمد کرلی گئی۔
ترجمان اے این ایف کے مطابق چرس واٹر کولر اور ہاٹ پاٹ میں چھپا کر پشاور سے اسمگل کی گئی تھی، پسنی کے قریب گاڑی کے خفیہ خانوں میں چھپائی گئی 17 کلو افیون برآمد کرلی گئی۔
ترجمان نے بتایا کہ دوران کارروائی تربت کے ہائشی 2 ملزمان کو حراست میں لے لیا گیا ہے جبکہ چارسدہ روڈ پشاور کے قریب مقامی رہائشی سے 450 گرام آئس برآمد کرلی گئی ہے۔
خیبر کے علاقے زخہ خیل میں اسمگلنگ کی غرض سے چھپائی گئی 9 کلو چرس برآمد کرکے ملزمان کیخلاف انسداد منشیات ایکٹ کے تحت مقدمات درج کرلئے گئے ہیں، جبکہ تحقیقات کا آغاز کردیا گیا ہے۔
واضح رہے کہ گزشتہ روز اے این ایف نے مختلف کارروائیوں کے دوران بھاری مقدار میں منشیات برآمد کرکے 4 ملزمان کو حراست میں لے لیا تھا۔
