The news is by your side.

Advertisement

عمرہ درخواست کی آخری تاریخ کا اعلان

سعودی وزارت حج و عمرہ نے یاد دہانی کروائی ہے کہ بیرون ملک سے عمرہ ویزہ کے لیے پیر 16 مئی آخری دن ہے۔

وزارت نے بیان میں واضح کیا ہے کہ عمرہ ویزہ پر بیرون ملک سے مملکت آنے کی آخری تاریخ شوال کا آخری دن ہے جب کہ سعودی عرب سے عمرہ زائرین کی روانگی کا آخری دن 30 ذوالقعدہ ہے۔

سعودی وزارت حج و عمرہ نے کہا ہے کہ عمرہ ویزے کی مدت 30 روز کر دی گئی ہے، اب عمرہ ویزے پر آنے والے مختلف شہروں میں جا سکیں گے۔

سعودی وزارت کے مطابق عمرہ زائرین مکۃ المکرمہ اور مدینہ منورہ کے شہروں کے درمیان اور مملکت کے تمام شہروں میں اپنے قیام کے دوران جانے کے لیے آزاد ہیں۔

سعودی حکام نے حال ہی میں عمرہ کرنے کے حوالے سے اقدامات میں نرمی کی ہے، کیوں کہ مملکت میں کرونا وبا کے خلاف پابندیوں میں بڑی حد تک نرمی آ چکی ہے۔

وزارت حج و عمرہ نے متعدد پابندیاں ختم کی ہیں جن میں مکہ میں نماز ادا کرنے اور مدینہ منورہ میں مسجد نبویﷺ میں جانے کے اجازت ناموں کی منسوخی بھی شامل ہیں، اب زائرین کو اس کی اجازت ہوگی۔

وزارت نے یہ بھی کہا ہے کہ دونوں مقدس مقامات میں داخل ہونے کے لیے حفاظتی ٹیکوں کی جانچ تمام عبادت گزاروں کے لیے ختم کر دی گئی ہے۔

Comments

یہ بھی پڑھیں