ریاض: سعودی عرب میں سرکاری، پرائیوٹ اورانٹرنیشنل اسکولوں کے سالانہ امتحانات کی تاریخوں کا اعلان کردیا گیا، نتائج کا اعلان 30 جون 2022 کو ہوگا۔
سعودی ویب سائٹ کے مطابق سعودی وزارت تعلیم نے سرکاری، پرائیوٹ اورانٹرنیشنل اسکولوں کے سالانہ امتحانات کی تاریخوں کی منظوری دے دی، اسپیشل ٹریننگ پروگراموں اور تعلیم بالغاں کے مراکز کے امتحانات کی تاریخیں بھی جاری کردی گئیں۔
20 ذی القعدہ 1443 ہجری مطابق 19 جون 2022 اتوار سے طلبہ و طالبات کے پریکٹیکل اور زبانی امتحانات شروع ہوں گے۔
تحریری امتحانات کا آغاز 26 جون 2022 بروز اتوار سے ہوگا، یکم ذی الحج 1443 ہجری مطابق 30 جون 2022 تک جاری رہیں گے، نتائج کا اعلان جمعرات 30 جون کو ہی ہوگا۔
وزارت تعلیم نے کہا ہے کہ ہمارے اساتذہ و دفتری عملے، طلبہ و طالبات کے سرپرستوں نے تعلیمی سال کو کامیاب بنانے میں قابل قدر کردار ادا کیا۔ اس پر وزارت سب کی شکر گزار ہے۔
