کراچی : تین ہٹی کے قریب پھول منڈی میں فائرنگ سے کورنگی کے گل فروش کی جان چلی گئی، مقتول پانچ بچوں کا باپ تھا۔
تفصیلات کے مطابق کراچی میں ڈاکوؤں نےایک اورشہری کوموت کی نیند سلا دیا، تین ہٹی کے قریب پھول منڈی میں گلاب خریدنے آنے والا کورنگی کا گل فروش ڈاکووں کی گولی کا نشانہ بن گیا۔
42 سالہ جبران خریداری میں مصروف تھا، اسی دوران ایک دکاندار کو لوٹنے کے بعد فرار ہوتے ڈاکوؤں نے فائرنگ کردی، فائرنگ کی زد میں آکر 42 سالہ جبران موقع پر جاں بحق ہوگیا۔
مقتول جبران کورنگی چار نمبر ایف ایریا کا رہائشی اور 5 بچوں کا باپ تھا، مقتول پانچ بھائیوں میں بھی سب سے چھوٹا تھا۔
لواحقین کا مزید بتانا ہے کہ جبران کچھ سال قبل سبزی فروشی کا کام ختم کرکے بھائیوں کے ساتھ گل فروشی کا کاروبار شروع کیا اور اکثر خریدداری کے لیے تین ہٹی جاتا تھا۔
خیال رہے رواں سال میں ڈاکووں کی فائرنگ سے جاں بحق افراد کی تعداد 15ہوگئی ہے۔
