The news is by your side.

Advertisement

کراچی میں کانگو وائرس کا ایک اور کیس رپورٹ

کراچی: شہر قائد میں کانگو وائرس کا ایک اور کیس سامنے آگیا جس کے بعد متاثرہ شخص کو جناح اسپتال منتقل کردیا گیا۔

جناح اسپتال کی ایگزیکٹو ڈائریکٹرڈاکٹر سیمی جمالی کے مطابق 33 سالہ مریض کی شناخت حاجی بخش کے نام سے ہوئی جو سندھ کے ضلع شہداد پور کا رہائشی ہے۔

متاثرہ شخص کو اسپتال منتقل کرنے کے بعد مختلف ٹیسٹ کرائے گئے جس میں کانگو وائرس کی تصدیق ہوئی، ڈاکٹرز نے حاجی بخش کو فوری طور پر انتہائی نگہداشت وارڈ میں داخل کرلیا۔

یاد رہے کہ گزشہ ماہ 9  اگست کو  شہر قائد میں کانگو وائرس کا ایک اور کیس سامنے آیا تھا، متاثرہ نوجوان کی عمر 17 سال تھی جو کراچی کے علاقے سہراب گوٹھ کا رہائشی اور بھینسوں کے باڑے میں کام کرتا تھا۔

خیال رہے کہ کراچی میں رواں سال پہلا کانگو وائرس کا کیس 11 فروری کو سامنے آیا تھا، اورنگی ٹاؤن کی رہایشی خاتون تعظیم فیضان کو تشویش ناک حالت میں جناح اسپتال منتقل کیا گیا تھا۔ گزشتہ سال اس وائرس کے نتیجے میں کراچی میں 16 اموات ہوئی تھیں جب کہ 41 مریضوں میں کانگو کریمین ہیمریجک فیور کی تصدیق کی گئی تھی، جن میں سے بیش تر مریضوں کا تعلق کوئٹہ بلوچستان سے تھا۔

مزید پڑھیں: کراچی: ایک ماہ میں کانگو بخار سے 3 اموات کا انکشاف

کراچی میونسپل کارپوریشن (کے ایم سی) نے 24 جولائی کو کراچی میں اپنے زیر انتظام اسپتالوں میں انسداد کانگو وائرس کا الرٹ جاری کیا تھا۔

کانگو وائرس کیا ہے؟

یہ وائرس مویشی کی کھال سے چپکی چیچڑوں میں پایا جاتا ہے، چیچڑی کے کاٹنے سے وائرس انسان میں منتقل ہو جاتا ہے، قومی ادارۂ صحت کے مطابق نیرو نامی وائرس انسانی خون، تھوک اور فضلات میں پایا جاتا ہے جو انسانوں میں گانگو بخار پھیلاتا ہے۔

کانگو کی علامات

متاثرہ شخص کو تیز بخار، کمر، پٹھوں، گردن میں درد، قے، متلی، گلے کی سوزش اور جسم پر سرخ دھبے کانگو کی علامات ہیں۔

احتیاطی تدابیر

جانوروں کے پاس جانے سے گریز کیا جائے، مویشیوں کے پاس جانے کی ضرورت پیش آئے تو دستانوں کا استعمال ضرور کیا جائے۔

یاد رہے کہ کانگو وائرس کے خاتمے کے لیے تا حال کوئی ویکسین ایجاد نہیں ہوئی ہے لہٰذا قبل از وقت احتیاط اور مرض ظاہر ہو جانے کی صورت میں فوری اور بر وقت علاج ضروری ہے۔

Comments

comments

یہ بھی پڑھیں