The news is by your side.

Advertisement

پنجاب میں ایک اور قیمتی جان پتنگ بازی کے شوق کی بھینٹ چڑھ گئی

وزیر اعلیٰ کی ہدایت پر ایس ایچ او مغل پورہ کو معطل کر کے لائن حاضر کر دیا گیا

لاہور: صوبہ پنجاب میں ایک اور قیمتی جان دوسروں کے پتنگ بازی کے شوق کی بھینٹ چڑھ گئی ہے۔

تفصیلات کے مطابق لاہور کے علاقے مغل پورہ میں پتنگ کی ڈور گلے پر پھرنے سے ایک شخص جاں بحق ہو گیا ہے، ریسکیو ذرایع کا کہنا ہے کہ 40 سالہ عامر موٹر سائیکل پر صدر بازار جا رہا تھا کہ افسوس ناک واقعہ پیش آیا۔

وزیر اعلیٰ پنجاب عثمان بزدار نے مغل پورہ میں گلے پر ڈور پھرنے سے شہری کی موت کا فوری نوٹس لے لیا، اور سی سی پی او لاہور سے رپورٹ طلب کر لی۔ وزیر اعلیٰ نے جاں بحق ہونے والے شہری کے لواحقین سے اظہار تعزیت بھی کیا۔

انھوں نے غفلت برتنے والوں کے خلاف کارروائی کا حکم جاری کرتے ہوئے کہا کہ پابندی کے باوجود پتنگ بازی کے واقعات ناقابل برداشت ہیں، پابندی کے قانون پر سختی سے عمل درآمد کرایا جائے۔

یہ بھی پڑھیں:  لاہور: گلے پر ڈور پھرنے سے نوجوان جاں بحق، پولیس حدود کا تنازع

عثمان بزدار نے کہا کہ جس علاقے میں پتنگ بازی ہوئی وہاں کے متعلقہ پولیس افسران ذمے دارہوں گے۔

دریں اثنا، وزیر اعلیٰ کی ہدایت پر ایس ایچ او مغل پورہ کو معطل کر کے لائن حاضر کر دیا گیا، ڈی آئی جی آپریشنز نے ایس ایچ او مدثراللہ کو معطل کر کے ایس ایس پی آپریشنز کو واقعے کی انکوائری کی ہدایت جاری کر دی۔

یاد رہے کہ 20 اکتوبر کو بھی لاہور کے علاقے ساندہ میں گلے پر ڈور پھرنے سے موٹر سائیکل سوار جاں بحق ہو گیا تھا، جس پر وزیر اعلیٰ پنجاب عثمان بزدار نے نوٹس لے کر رپورٹ طلب کر لی تھی، اور کہا تھا کہ پابندی کے باوجود پتنگ بازی کا واقعہ نا قابل برداشت ہے، پتنگ بازی پر پابندی کے قانون پر سختی سے عمل درآمد یقینی بنایا جائے۔

Comments

comments

یہ بھی پڑھیں