لاہور : صحافی عمران ریاض کے والد نے بیٹے کی بازیابی کے لئے ایک اور درخواست دائر کردی ، جس میں استدعا کی گئی ہے کہ کسی شہری کو بازیاب کرانا وزیراعظم کی ذمہ داری ہے۔
تفصیلات کے مطابق لاہورہائی کورٹ میں صحافی عمران ریاض کی بازیابی کیلئے ایک اور درخواست دائر کردی گئی، درخواست عمران ریاض کے والد نے اظہر صدیق کے توسط سے دائر کی۔
درخواست میں وزیراعظم،نگران وزیراعلیٰ اور دیگر کو فریق بنایا گیا ہے ، درخواست میں مؤقف اختیار کیا گیا ہے کہ شہریوں کے جان و مال کا تحفظ حکومت کی ذمہ داری ہے ، کسی شہری کو بازیاب کرانا وزیر اعظم کی ذمہ داری ہے۔
متفرق درخواست میں کہا گیا کہ وزیر اعظم اپنی ذمہ داری ادا کرنے کے پابند ہیں، استدعا ہے کہ وزیر اعظم اپنی ذمہ داری ادا نہیں کرتے تو ان کیخلاف کارروائی کی جائے۔
یاد رہے دو روز قبل لاہور ہائیکورٹ میں سینئر اینکر عمران ریاض کی بازیابی کیلئے درخواست پرسماعت ہوئی تھی ، جس میں آئی جی پنجاب عثمان انوار نے بتایا تھا کہ عمران ریاض خان پاکستان کی کسی ایجنسی کے پاس نہیں، ہم نے آف دی ریکارڈ سب سے رابطے کیے ہیں،عدالت وزارت دفاع اور وزارت داخلہ کو نوٹس کردے تو معاونت ہوسکے۔
چیف جسٹس لاہور ہائیکورٹ نے ریمارکس دیئے تھے کہ مجھے عمران ریاض کی زندگی کی فکر ہے ،عدالت چاہتی ہے عمران ریاض کی زندگی کو خطرہ نہ ہو، عدالت مواقع دے رہی ہے ان کے پاس کوئی بہانہ نہ رہ جائے۔
بعد ازاں عدالت نے آئی جی پنجاب کو عمران ریاض کی بازیابی کیلئے اقدامات کی ہدایت کرتے ہوئے سماعت غیر معینہ مدت کیلئے ملتوی کردی تھی۔
