کراچی : شہر قائد میں ڈکیتی مزاحمت پر ایک اور نوجوان کو قتل کردیا گیا اور ملزمان کار چھین کر فرار ہوگئے۔
تفصیلات کے مطابق کراچی میں اسٹریٹ کرمنلز کی سفاکیت عروج پر ہیں، ڈاکوؤں نے ایک اورنوجوان کی جان لے لی۔
کراچی کے علاقے منگھوپیر میں ڈکیتی مزاحمت پر نوجوان کو قتل کردیا گیا۔
پولیس حکام نے بتایا کہ مقتول وقاص نیازی کے پاس رینٹ کی کار تھی، جو ملزمان چھین کر فرار ہوگئے۔
مقتول کے کزن کا کہنا ہے کہ وقاص سواری لینے کا کہہ کر نکلا تھا، اس کی کار اور موبائل فون غائب ہے اوراس کا دو سال کا ایک بیٹا ہے۔
خیال رہے یکم جنوری سے 23 جنوری تک ایک خاتون اور سیکیورٹی اہلکار سمیت 10 شہری اسٹریٹ کرمنلز کی بے رحم گولیوں کا نشانہ بن چکے ہیں۔
ڈکیتی مزاحمت پر 9 تھانوں کی حدود میں 10 شہریوں کو نشانہ بنایا گیا، پہلا قتل عوامی کالونی ، دوسرا شارع فیصل، تیسرا سچل چوتھا سائٹ سپرہائی وے ، پانچواں سرجانی، چھٹا قتل بلدیہ، ساتواں بلال کالونی، آٹھواں بوٹ بیسن ، نواں شارع فیصل اور دسواں سعیدآباد بلدیہ میں ہوا۔
