کراچی : سابق صدر اور پیپلزپارٹی کے شریک چیئرمین آصف زرداری نے کہا ہے کہ عیدالاضحیٰ کے بعد بڑی انتخابی مہم چلائی جائے گی، ہم اس شخص کا ساتھ نہیں دیں گے جو جمہوریت کے خلاف ہوگا، ان کا کہنا ہے کہ وہ خود آئندہ الیکشن میں کامیابی کے لئے ہرصوبے میں جائیں گے۔
ان خیالات کااظہار انہوں نے دبئی میں ملاقات کیلئے آنے والے سابق سینیٹر اورنومنتخب رکن صوبائی اسمبلی سعید غنی سے گفتگو کرتے ہوئے کیا، اس موقع پر انہوں نے عید الاضحیٰ نواب شاہ میں منانے کا اعلان بھی کیا۔
آصف زرداری نے کہا کہ میں نے میاں صاحب کو کہا بھی تھا کہ مستعفی ہوجائیں ورنہ دمادم مست قلندر ہوگا، اب عدالتی فیصلے کے بعد دما دم مست قلندرکا نعرہ عوام نے ہی لگادیا۔
مزید پڑھیں: آصف زرداری کا کارکنان کو انتخابات کی تیاری کا حکم
پی پی شریک چیئرمین نے کہا کہ ہم کبھی اس شخص کا ساتھ نہیں دیں گے جو جمہوریت کے خلاف ہوگا، انہوں نے کہا ہم نے اداروں کو آئینی طریقے سے مضبوط کیا، جمہوریت کو نقصان پہنچانے والوں کے راستے آئینی طریقے سے بند کئے۔
انہوں نے کہا کہ آرٹیکل باسٹھ تریسٹھ مخالفت کرنے والوں کے ہی گلے آگیا، روایات برقرار رکھی جاتی تو میاں صاحب کو یہ دن دیکھنا نہ پڑتے۔
