اسلام آباد : سپریم کورٹ میں ججز کی تعیناتی اور ہائی کورٹس کے قائم مقام چیف جسٹس کے نوٹیفکیشنز جاری کر دیئے گئے۔
تفصیلات کے مطابق وفاقی وزارت قانون و انصاف نے صدر مملکت آصف علی زرداری کی جانب سے سپریم کورٹ میں 6 مستقل اور ایک قائم مقام جج کے تقرر کی منظوری کے بعد باقاعدہ نوٹیفکیشن جاری کردیا اور ساتھ متعلقہ ہائی کورٹس میں قائم مقام چیف جسٹسز کی تقرری بھی کردی گئی۔
وزارت قانون و انصاف کی جانب سے ججز کی تعیناتی کے جاری نوٹیفکیشن کے مطابق جسٹس عامر فاروق، جسٹس ہاشم کاکڑ سپریم کورٹ کے جج تعینات کیے گئے ہیں۔
نوٹیفکیشن میں بتایا گیا ہے کہ جسٹس شکیل احمد، جسٹس شفیع صدیقی، جسٹس صلاح الدین ،جسٹس اشتیاق ابراہیم کو سپریم کورٹ کا جج تعینات کیا گیا ہے۔ اس کے علاوہ میاں گل حسن اورنگزیب کو سپریم کورٹ کا قائم مقام جج تعینات کیا گیا ہے۔
علاوہ ازیں ہائی کورٹس میں بھی قائم مقام ججز کی تعیناتی کی گئی ہے، نوٹیفکیشن کے مطابق جسٹس جنید غفار قائم مقام چیف جسٹس سندھ ہائی کورٹ اور جسٹس اعجاز سواتی قائم مقام چیف جسٹس بلوچستان ہائیکورٹ تعینات کیے گئے ہیں۔
جسٹس ایس ایم عتیق شاہ قائم مقام چیف جسٹس پشاور ہائیکورٹ، جسٹس سرفراز ڈوگراسلام آباد ہائیکورٹ کے قائم مقام چیف جسٹس جبکہ جسٹس سرفراز ڈوگر مستقل چیف جسٹس کی تعیناتی تک فرائض انجام دیں گے۔
