جدہ: صدر مملکت ڈاکٹر عارف علوی نے مدینہ منورہ میں سیرت طیبہ کے بین الاقوامی میوزیم کا دورہ کیا۔
تفصیلات کے مطابق صدر پاکستان ڈاکٹر عارف علوی نے مدینہ منورہ میں سیرت طیبہ اور اسلامی تمدن کے بین الاقوامی عجائب گھر کا دورہ کیا ہے، صدر مملکت کا خیر مقدم میوزیم کے سربراہ شیخ ڈاکٹر ناصر الزھرانی نے کیا۔
صدر عارف علوی نے عجائب گھر کے مختلف حصوں کا مشاہدہ کیا، انھیں ٹیکنالوجی شو بھی دکھائے گئے، نبی کریم صلی اللہ علیہ و سلم کے عہد میں مکہ مکرمہ اور مدینہ منورہ کے تمدنی ماڈلز کا مشاہدہ بھی کرایا گیا۔
عارف علوی کو سیرت طیبہ اور پیغمبر اسلام صلی اللہ علیہ و سلم کی زندگی کے مختلف جمالیاتی پہلوؤں سے بھی آگاہ کیا گیا، صدر پاکستان کو نبی کریم صلی اللہ علیہ وسلم کی حیات طیبہ سے متعلق ایک فلم بھی دکھائی گئی، عارف علوی نے عجائب گھر کے منتظمین خصوصاً سعودی حکومت اور رابطہ عالم اسلامی کا شکریہ ادا کیا۔
