اسلام آباد: پاکستان سمیت دنیا بھر میں یوم مزدور منایا جارہا ہے، صدر ڈاکٹر عارف علوی اور وزیراعظم شہباز شریف کی جانب سے محنت کشوں کے عالمی دن پر خصوصی پیغام جاری کیا گیا۔
یوم مزدور پر صدر مملکت ڈاکٹر عارف علوی نے اپنے پیغام میں کہا کہ یوم مئی پر مزدوروں کو خراج تحسین پیش کرتا ہوں، یوم مزدور معاشی ترقی میں ان کے کردار کا بھی اعتراف ہے، مزدور اور آجر پیداواری عمل میں شراکت دار ہیں۔
صدر مملکت کا کہنا تھا کہ مزدور کا تعاون صنعتی پیداوار میں اضافے، ملکی ترقی کیلئے ضروری ہے، معاشی خوشحالی میں حصہ ڈالنے کے باوجود مزدوروں کو مسائل کا سامنا ہے، مزدوروں کو کم اجرت، ملازمت کے عدم تحفظ جیسے مسائل درپیش ہیں۔
انہوں نے کہا کہ لیبر فورس ہماری معیشت میں ریڑھ کی ہڈی کی حیثیت رکھتی ہے، مزدوروں حقوق کے تحفظ کے لیے اقدامات کرنا انتہائی ضروری ہے، پاکستان کے پاس ایک بہت بڑی لیبر فورس اور نوجوانوں کی تعداد ہے، لیبر فورس کو جدید ہنر فراہم کرنےکی ضرورت ہے۔
دوسری جانب وزیر اعظم شہباز شریف نے کہا کہ محنت کشن طبقے کی سماجی اور معاشی بہبود کو یقینی بنانے کیلئے پرعزم ہیں، ملکی ترقی میں محنت کش طبقے کے اہم کردار سے انکار ممکن نہیں، اسلامی تعلیمات کے مطابق مزدور اور آجر پیدواری عمل میں شراکت دار ہیں۔
وزیر اعظم نے کہا کہ مزدور اور آجر کا تعاون، دوستانہ تعلق مجموعی سماجی اور اقتصادی ترقی کیلئے ضروری ہے، مزدورکو بہتر رہائش، تعلیم اور صحت کا تحفظ فراہم کرنے کیلئے پرعزم ہیں۔
