ایریزونا: امریکا میں فضا میں ہیلی کاپٹر اور طیارہ ٹکرا گئے، اس حادثے کے سبب 2 افراد ہلاک ہو گئے۔
تفصیلات کے مطابق امریکی ریاست ایریزونا کے علاقے چینڈلر میں جمعے کو فضا میں ایک ہیلی کاپٹر اور چھوٹے طیارے کے مابین ٹکراؤ ہو گیا، جس میں ہیلی کاپٹر میں سوار 2 افراد ہلاک ہو گئے۔
مقامی حکام کا کہنا تھا کہ حادثہ جمعے کی صبح کو پیش آیا، جب طیارہ اور ہیلی کاپٹر مقامی ایئر پورٹ پہنچے، فضا میں ٹکرانے کے بعد ہیلی کاپٹر سنبھل نہ سکا اور زمین پر گر گیا، جس کے باعث اس میں آگ لگ گئی۔
مقامی فائر بریگیڈ حکام نے بتایا کہ ٹکر کے بعد طیارہ لینڈنگ میں کامیاب ہو گیا، طیارہ اور ہیلی کاپٹر دونوں الگ الگ فلائٹ اسکولز سے تعلق رکھتے تھے۔
حادثے کے کچھ ہی دیر بعد چینڈلر پولیس محکمے نے ایک ٹوئٹر پوسٹ میں کہا کہ پولیس افسر جائے وقوعہ پر پہنچ گئے ہیں، اگر عینی شاہدین کے پاس حادثے سے متعلق کوئی فوٹیج ہو تو پولیس ڈیپارٹمنٹ سے رابطہ کر لیں۔
طیارہ فکس ونگز اور سنگل انجن پائپر تھا، حادثے میں طیارے کے صرف لینڈنگ گیئر کو نقصان پہنچا، حکام نے حادثے کی تحقیقات شروع کر دی ہیں۔
