راولپنڈی : آرمی چیف جنرل عاصم منیر نے سپاہی عمران شہید کی بیٹی عذرا سے ملاقات میں کہا کہ پوری قوم کو آپ کے بابا سپاہی عمران شہید پر ناز ہے۔
تفصیلات کے مطابق تکریمِ شہدا پاکستان کے موقع پر آرمی چیف جنرل عاصم منیر نے سپاہی عمران شہیدکی بیٹی عذرا سے ملاقات کی، آرمی چیف نے شہید کی بیٹی کو آج جی ایچ کیوکی تقریب میں خصوصی طور پر مدعو کیا۔
ملاقات میں آرمی چیف نے انتہائی شفقت اور پیار سے قوم کی بیٹی کو یقین دلایا کہ شہدا کی قربانیوں کو ہرگزفراموش نہیں ہونےدیں گے ، ہرمشکل میں پاک فوج ہمیشہ آپ کےساتھ کھڑی رہے گی۔
جنرل عاصم منیر کا کہنا تھا کہ ہماری نوجوان نسل خاص کربچےملک کےمستقبل کےمعمار ہیں ، پاک فوج ملک میں امن وسلامتی کےقیام کی خاطرہمیشہ اپنی کوششیں جاری رکھے گی۔
آرمی چیف نےبیٹی سے کہا کہ پوری قوم کو آپ کے بابا سپاہی عمران شہید پر ناز ہے ، ملک و قوم کے تمام شہدا ہمارے لیے باعثِ فخر ہیں۔
یاد رہے کچھ دن قبل سپاہی عمران شہید کی بیٹی کے ویڈیو بیان نےپوری قوم کو اشکبار کردیا تھا ، شہید کی بیٹی نے اپنے پیغام میں 9 مئی یومِ سیاہ کے افسوسناک واقعات کی مذمت کی تھی۔
سپاہی عمران نے 12 اپریل 2022 میں انگوراڈہ میں وطنِ عزیز کی خاطرجام شہادت نوش کیا، سپاہی عمران شہیدکاتعلق ڈیرہ مرادجمالی بلوچستان سے ہے، شہید نے ورثا میں بیوہ اور5 بچے چھوڑے۔
