34ویں نیشنل گیمز جیولن تھرو فائنل میں پاکستان واپڈا کے ارشد ندیم نے گولڈ میڈل جیت لیا۔
اے آر وائی نیوز کے مطابق کامن ویلتھ گیمز کے گولڈ میڈلسٹ ارشد ندیم نے نیشنل گیمز میں بھی سونے کا تمغہ جیت لیا، جیولن تھرو فائنل میں واپڈا کے اسٹار ایتھلیٹ نے 78 میٹر سے زائد کی تھرو کی۔
واپڈا ہی کے یاسر جیولن تھرو میں چاندی کا تمغہ جیتنے میں کامیاب ہوئے۔
ارشد ندیم نے کہا کہ سرجری کے بعد صرف ایک ماہ ٹریننگ کی، نیشنل گیمز میں صرف گولڈ کی تیاری کی تھی، کامن ویلتھ گیمز اور اسلامک گیمز کے بعد سرجری کے عمل سے گزرا۔
انہوں نے کہا کہ سرجری کے بعد کم بیک کیا، اب گولڈ میڈل لینے سے حوصلہ ملا ہے، آئندہ ماہ ٹریننگ کے لیے جرمنی جارہا ہوں، اگست میں ورلڈ چیمپئن شپ پھر ایشین گیمز اور پیرس اولمپکس جیسے بڑے ایونٹ ہیں۔
قومی ایتھلیٹ نے کہا کہ ساری توجہ پیرس اولمپکس پر ہے، خود کو مکمل فٹ رکھنے کی بھرپور کوشش ہوگی۔
