اسلام آباد : ارشد شریف قتل کیس میں ملوث دو ملزمان خرم اور وقار کے اشتہاری ہونے کے وارنٹ حاصل کرلیے گئے ہیں۔
تفصیلات کے مطابق ارشد شریف قتل کیس میں ملوث دو ملزمان خرم اور وقار کو اشتہاری قرار دینے کی کارروائی مکمل کرلی گئی۔
خرم اور وقار کے مقامی عدالت سے اشتہاری ہونے کے وارنٹ حاصل کرلیے گئے ہیں۔
جے آئی ٹی نے ایف آئی اے انٹرپول سے رابطہ کیا ، جس کے بعد ایف آئی اے نے انٹرپول ہیڈ کوارٹر کو خط لکھ دیا ہے۔
خط میں دونوں ملزمان کے ریڈوارنٹ جاری کرنے کی استدعا کی گئی ہے جبکہ خط کےساتھ دونوں ملزمان کے اشتہار بھی ساتھ لگائے گئے ہیں۔
اس سے قبل سپریم کورٹ نے ارشد شریف قتل ازخود نوٹس کیس میں جے آئی ٹی رپورٹ مسترد کردی تھی اور کہا تھا اہم معاملہ ہے بے نتیجہ نہیں چھوڑیں گے، فیکٹ فائنڈنگ رپورٹ کس نے لیک کی ہمیں پتہ کرکے بتائیں۔
جسٹس عطا بندیال کا کہنا تھا کہ کس نے یہ جے آئی ٹی کی رپورٹ پبلک کی یہ معلوم کرنا ہے، انکوائری کے نکات ملک کے اندر کیا تھے اور دوسرے ملک میں تحقیقات کا کیا طریقہ اپنایا گیا، دونوں ممالک کے درمیان تحقیقات شروع ہونے سے پہلے کچھ ایسا ہوا کہہ دونوں ٹیمیں سست ہوگئیں۔
