ممبئی: کروز شپ منشیات کیس میں گرفتار کنگ خان کے بیٹے کی ضمانت کا معاملہ مزید طویل ہوگیا، عدالت نے دوبارہ آریان خان کو جیل بھیج دیا ہے۔
بھارتی میڈیا رپورٹ کے مطابق مبئی کی سیشن کورٹ میں منشیات کیس میں گرفتار بالی ووڈ کنگ شاہ رخ خان کے بیٹے آریان خان کی ضمانت کی درخواست پر سماعت ہوئی، سماعت کے دوران نارکوٹکس کنٹرول بیورو (این سی بی) کے وکیل انیل سنگھ نے عدالت کو بتایا کہ یہ حقیقت ہے کہ آریان خان کے پاس سے منشیات برآمد نہیں ہوئی لیکن اس کا یہ مطلب نہیں کہ انہیں ضمانت ملنی چاہئے۔
انیل سنگھ نے آریان خان کے کیس کا موازنہ اداکارہ ریحا چکربورتی کے بھائی شویک چکربورتی سے کرتے ہوئے کہا کہ اس کے پاس سے بھی منشیات برآمد نہیں ہوئی تھی لیکن اس وقت بھی عدالت نے کہا تھا کہ معاملے کی تحقیقات جارہی ہیں۔
این سی بی کے انیل سنگھ نےعدالت میں آریان کی ضمانت کی مخالفت کرتے ہوئے کہا کہ عدالت میں پیش کیے جانے والے ریکارڈوشواہد سے پتہ چلتا ہے کہ آریان خان گزشتہ چند برسوں سے باقاعدہ منشیات کے عادی ہیں۔
یہ بھی پڑھیں: آریان خان کی گرفتاری، وکیل کا حیران کُن انکشاف
آریان خان کے ساتھ گرفتار ہونے والے ارباز مرچنٹ کے پاس سے جو منشیات برآمد ہوئی وہ ان دونوں کے استعمال کے لیے تھی۔
دوسری جانب آریان خان کے وکیل امت دیسائی نے عدالت کو آگاہ کیا کہ آریان خان کیس سے متعلق عدالت سے ہر ممکن تعاون کرینگے، انہیں ضمانت ملنی چاہئے، انہوں نے کہا کہ آج کل کے بچوں کی انگلش زبان ہم سے بہت مختلف ہے، ان کی بات چیت کو ایجنسی شکوک کی نگاہ سے دیکھتی ہے۔
آریان خان کے وکیل امیت دیسائی نے کہا کہ میں کسی کو بری کرنا کا نہیں بلکہ ضمانت کا کہہ رہا ہوں، بعد ازاں عدالت نے دونوں فریقین کے دلائل سننے کے بعد درخواست ضمانت پر فیصلہ بیس اکتوبر تک محفوظ کرلیا۔
