پشاور: ہائیکورٹ نے اسد قیصر کا نام ای سی ایل سے نکالنے کا حکم دے دیا۔
تفصیلات کے مطابق سابق اسپیکر اسد قیصر کا نام ای سی ایل میں ڈالنے کے خلاف دائر درخواست پر سماعت مکمل کرتے ہوئے جسٹس شکیل احمد اور جسٹس صاحبزادہ اسد اللہ پر مشتمل بینچ نے اسد قیصر کا نام ایگزٹ کنٹرول لسٹ سے نکالنے کا حکم دے دیا۔
عدالت نے 23 جون 2023 کو اسد قیصر کا نام ای سی ایل میں شامل کرنے کا آرڈر غیر آئینی غیر قانونی قرار دیا۔
کیس میں اسد قیصر کے وکیل معظم بٹ اور ارشد علی ایڈووکیٹ عدالت میں پیش ہوئے، وکیل درخواست گزار معظم بٹ ایڈووکیٹ نے کہااسد قیصر سابق اسپیکر قومی اسمبلی ہے، عمرہ کی ادائیگی کے لیے جا رہے تھے کہ ان کو روکا گیا۔
جسٹس صاحبزادہ اسد اللہ نے استفسار کیا کہ اسد قیصر کا نام کب ای سی ایل میں شامل کیا گیا؟ وکیل نے بتایا کہ 23 جون کو ان کا نام ای سی ایل پر ڈالا گیا تھا۔ جسٹس شکیل احمد نے استفسار کیا کہ کیا یہ اب ممبر قومی اسمبلی بھی منتخب ہوئے ہیں؟ وکیل نے بتایا کہ جی یہ ممبر قومی اسمبلی ہے اور سینئر سیاست دان ہے۔
عدالت نے اسد قیصر کا نام ای سی ایل میں ڈالنے کا آرڈر غیر قانونی قرار دیتے ہوئے اسد قیصرکا نام ای سی ایل سے فوری طور پر نکالنے کا حکم جاری کر دیا۔
