اسلام آباد : سابق اسپیکرقومی اسمبلی اسد قیصر نے گرفتاری سے بچنے کیلئے ہائی کورٹ سے رجوع کرلیا اور ملک بھر میں درج مقدمات کی فہرست فراہم کرنے کی استدعا کردی۔
تفصیلات کے مطابق سابق اسپیکر قومی اسمبلی اسد قیصر نے گرفتاری سے بچنے کیلئے ہائی کورٹ درخواست دائر کردی ، جس میں کہا گیا کہ عمران خان کی کال پر لانگ مارچ میں شریک ہوا جس پر مقدمات ہوئے، مختلف جگہوں پرپولیس ،ایف آئی اے نے مقدمات درج کئے۔
اسد قیصر نے ملک بھر میں درج مقدمات کی فہرست فراہم کرنے کی استدعا کرتے ہوئے مقدمات کی فہرست ملنےتک اسد قیصر کی گرفتاری سے روکنے کی استدعا کردی۔
سابق اسپیکر قومی اسمبلی نے کہا کہ درج مقدمات اور انکوائریوں کی تفصیلات فراہم کی جائیں، میرے خلاف درج تمام مقدمات غیر قانونی ہیں، پولیس،ایف آئی اے کو درج مقدمات میں گرفتاری سے روکا جائے۔
یاد رہے لانگ مارچ کےدوران توڑپھوڑ پر تحریک انصاف کے رہنماؤں شاہ محمود قریشی، شیخ رشید، غلام سرور، علی محمد خان اور شہریارآفریدی کی ضمانتیں منظور کرلی گئیں۔
عدالت نے پانچ پانچ ہزار کے مچلکے جمع کرانے کی ہدایت کرتے ہوئے آئندہ سماعت پر پولیس سے ریکارڈ طلب کرلیا، پی ٹی آئی رہنماؤں کے خلاف اسلام آباد کے مختلف تھانوں میں مقدمات درج ہیں۔
دوسری جانب حقیقی آزادی مارچ کے دوران تشدد کرنے پر اعظم سواتی نے رانا ثنا کے خلاف اندراج مقدمہ کا حکم دینے کے لیے جوڈیشل مجسٹریٹ سے رجوع کرلیا ہے۔
