لاہور : انسداد دہشت گردی عدالت نے پی ٹی آئی رہنما اسد عمرکو 5 مقدمات سے ڈسچارج کر دیا، اسدعمر پر تمام مقدمات میں 9 مئی کو توڑ پھوڑ اور ہنگامہ آرآئی کا الزام ہے۔
تفصیلات کے مطابق لاہور کی انسداد دہشت گردی عدالت نے پی ٹی آئی رہنما اسد عمر کو 5 مقدمات سےڈسچارج کر دیا، تفتیشی افسر نے کہا کہ اسد عمر مقدمات میں مطلوب نہیں۔
اسد عمر کیخلاف تھانہ سرور روڈ میں 3، ریس کورس میں ایک اور تھانہ گلبرگ میں ایک مقدمہ درج ہے، ان پر تمام مقدمات میں 9 مئی کو توڑ پھوڑ اور ہنگامہ آرآئی کا الزام ہے۔
دوسری جانب انسداددھشت گردی عدالت میں عسکری ٹاورحملہ اور تھانہ شادمان نذر آتش اور دیگر مقدمات میں پی ٹی آئی رہنما اسد عمرکی ضمانت کی درخواستوں پرسماعت ہوئی۔
اسد عمر 6مقدمات میں عبوری ضمانت کیلئے پیش ہوئے، تفتیشی افسر شادمان نے کہا کہ اسدعمر شامل تفتیش نہیں ہوئے، جس پر عدالت نے حکم دیا کہ ان کا ابھی بیان قلمبندکرائیں۔
تفتیشی افسر نے بتایا کہ اسد عمر نے ضمانتی مچلکے بھی جمع نہیں کرائے، جس پر عدالت نے ہدایت کی کہ آج 12 بجے تک ضمانتی مچلکے جمع کرائیں ورنہ ضمانت خارج ہو جائے گی۔
