پاکستان تحریک انصاف کے مرکزی سیکریٹری جنرل اسد عمر نے کہا ہے کہ مہنگائی کے خلاف ملک گیر تحریک چلائی جائے گی۔
اے آر وائی نیوز کے مطابق پی ٹی آئی کے مرکزی رہنما نے اسلام آباد میں پریس کانفرنس کرتے ہوئے کہا ہے کہ اس وقت انتہائی تشویشناک حالات ہیں۔ عوام مہنگائی کے طوفان سے شدید متاثر ہیں۔ مہنگائی کے خلاف ملک گیر تحریک چلائی جائے گی۔
اسد عمر نے کہا کہ قوم نے دیکھا کہ گزشتہ سال 13 جماعتوں پر مشتمل ٹولہ مہنگائی مکاؤ تحریک لے کر چلا تھا۔ مہنگائی کو بنیاد بنا کر ہماری حکومت کو ہٹایا گیا۔ اس کے لیے حرام کا پیسہ لگا کر ضمیروں کی منڈی لگائی گئی لیکن آج مہنگائی پر وفاقی ادارہ شماریات کے اعداد وشمار دیکھ لیں۔
انہوں نے کہا کہ ایک سال پہلے 20 کلو آٹا 1159 روپے کا تھا اب ادارے کی ویب سائٹ پر لکھا ہے 20 کلو آٹا 1619 روپے کا مل رہا ہے لیکن آٹا اس ریٹ پر کہاں مل رہا ہے؟ ہمیں نہیں معلوم۔ دودھ ایک سال قبل 130 روپے لیٹر آج 200 روپے ہے۔ ایک سال میں کھانا پکانے کے تیل کی قیمت میں 33 فیصد اضافہ ہوا ہے۔
پی ٹی آئی رہنما نے مزید کہا کہ ایک سال میں پٹرول کی قیمت میں 53 فیصد اور ڈیزل کی قیمت میں 65 فیصد اضافہ ہوا جب کہ عالمی منڈی میں تیل کی قیمت 75 سے 80 ڈالر فی بیرل کمی آئی ہے۔
سابق وفاقی وزیر نے کہا کہ عمران خان عوام کے ووٹ لے کر آیا تھا اس کے دل میں عوام کے لیے درد ہے۔ انہوں نے اپنی حکوتم میں عوام کو جو ریلیف دیا اسے یہ لوگ بارودی سرنگیں کہتے ہیں۔ یہ لوگ عوام پر مہنگائی کا بوجھ ڈال کر اسے مشکل فیصلے کہتے ہیں۔ اللہ انہیں ہدایت دے۔
اسد عمر نے کہا کہ موجودہ حکومت نے ایسے فیصلے کیے جس نے معیشت کے پہیے کو بُری طرح بریک لگا کر جام کردیا ہے۔ فیکٹریاں بند ہو رہی ہیں۔ ٹیکسٹائل انڈسٹری میں 15 لاکھ مزدور بیروزگار ہوچکے ہیں۔ آٹو موبائل بھی آہستہ آہستہ پروڈکشن بند کر رہا ہے۔ لوگوں کی آمدنی اور اخراجات میں 7 سے 8 ہزار کا فرق آگیا ہے۔
پی ٹی آئی رہنما نے وزیراعظم شہباز شریف آپ ارب پتی نہیں بلکہ مہا ارب پتی ہیں۔ آپ نے وعدہ کیا تھا کپڑے بیچ کر عوام کو ریلیف دوں گا۔ بتائیں کہ کتنے کپڑے بیچ کر عوام کو ریلیف دیا۔ ملک کو تباہی کی طرف لے جانیوالی موجودہ حکومت جلد ختم ہوگی اور 22 کروڑعوام فیصلہ کریں گے کہ پاکستان کی ذمے داری کون سنبھالے گا۔
اسد عمر نے کہا کہ تحریک انصاف بند کمروں کی سیاست پر یقین نہیں رکھتی بلکہ عوام کے ووٹوں پر سیاست کرتی ہے۔ ہم پر لازم ہیں کہ عوام کی آواز بنیں۔ پورے پاکستان بھر میں میں مہنگائی کے خلاف ریلیاں شروع ہوجائیں گی۔
