اسلام آاباد : خاتون اول آصفہ بھٹو نے سوشل میڈیا پر ثنا یوسف کے خلاف کی جانے والی کردار کشی پر اظہارافسوس کرتے ہوئے کہا ثنا یوسف کے ساتھ جو کچھ ہوا وہ محض ایک پُر تشدد واقعہ نہیں بلکہ ناں کہنے کی سزا تھی۔
تفصیلات کے مطابق ایم این اے آصفہ بھٹو نے طالب علم ثنا یوسف کے قتل کی شدید مذمت کرتے ہوئے خواتین کے خلاف تشدد پر مبنی بڑھتے رویوں پر اظہار تشویش کیا۔
آصفہ بھٹو نے لواحقین، برادری اور المناک سانحے پر غمزدہ تمام افراد سے دلی تعزیت کرتے ہوئے سوشل میڈیا پر مقتولہ کے خلاف کی جانے والی کردار کشی پر اظہار افسوس کیا۔
رکن قومی اسمبلی کا کہنا تھا کہ مردانہ برتری کی سوچ سے جنم لینے والے تشدد سے ہماری بیٹیاں قتل ہو رہی ہیں، مردانہ برتری کی سوچ سے پیدا تشدد ثقافت اور روایت کے نام پر مزید برداشت نہیں کیا جاسکتا۔
انھوں نے کہا کہ ثنا یوسف کے ساتھ جو کچھ ہوا وہ محض ایک پُرتشدد واقعہ نہیں بلکہ ناں کہنے کی سزا تھی، عورت کی ناں کو توہین سمجھنا، مرضی کو قابو میں رکھنا دقیانوسی و ظالمانہ سوچ ہے۔
مزید پڑھیں : ثناء یوسف قتل کیس کی تحقیقات میں اہم پیش رفت
خاتون اول کا مزید کہنا تھا کہ شہید محترمہ بینظیر بھٹو نے سماجی جبر کی دیواروں کو اپنی طاقت سے توڑا، کسی بھی لڑکی کی سوشل میڈیا موجودگی کو اس کے قتل کا جواز نہیں بنایا جاسکتا۔
انھوں نے کہا کہ لڑکیوں کو خوف زدہ ہونے کی ضرورت نہیں، پیچھے ہٹے تو تشدد کی سوچ جیت جائے گی، پاکستانی لڑکیوں کو خواب دیکھنے، بات کرنے اور بے خوف زندگی گزارنے کا پورا حق ہے۔
