کراچی : نگران وفاقی وزیر دفاع و برائے ہوا بازی عبداللہ حسین ہارون نے کہا ہے کہ ایئر پورٹ سیکیورٹی فورس ( اے ایس ایف )کو جدید سہولیات سے آراستہ کیا جائے گا۔
ان خیالات کا اظہار انہوں نے اے ایس ایف ہیڈکوارٹر کا دورے کے موقع پر گفتگو کرتے ہوئے کیا، اےآر وائی نیوز کے نمائندے صلاح الدین کے مطابق نگران وفاقی وزیر دفاع و برائے ہوا بازی عبداللہ حسین ہارون نے آج اے ایس ایف ہیڈ کوارٹر کا دورہ کیا۔
ڈی جی اے ایس ایف میجر جنرل علی عباس حیدر اور ڈپٹی ڈی جی بریگیڈیئر محمد زبیر نے استقبال کیا، اس موقع پر انہیں گارڈ آف آنر بھی پیش کیا گیا، نگران وفاقی وزیر عبداللہ حسین ہارون نے یادگار شہداء اے ایس ایف پر حاضری دی اور پھول چڑھائے۔
ڈی جی اے ایس ایف میجر جنرل علی عباس حیدر نے نگران وفاقی وزیر کو ا ے ایس ایف کے پیشہ ورانہ اور انتظامی امور سے متعلق بریفنگ دی۔
وفاقی وزیر کا کہنا تھا کہ اے ایس ایف ملک کے تمام ایئرپورٹس پر پیشہ ورانہ صلاحیتوں کے ساتھ احسن طریقے سے فرائض انجام دے رہی ہے، اے ایس ایف کو مزید جدید سہولیات سے بھی آراستہ کیا جائے گا۔
نگران وفاقی وزیر عبداللہ حسین ہارون نے اے ایس ایف کی قربانیوں اور پیشہ ورانہ مہارت کو سراہا اور کارکردگی پر اطمینان کا اظہار کیا۔
خبر کے بارے میں اپنی رائے کا اظہار کمنٹس میں کریں‘مذکورہ معلومات کو زیادہ سے زیادہ لوگوں تک پہچانے کے لیے سوشل میڈیا پر شیئر کریں۔
