ناٹنگھم : انگلینڈ نے آسٹریلیا کو چوتھے ٹیسٹ میں ایک اننگز اور 78 رنز سے شکست دے کر ایشیز سیریز جیت لی۔ تفصیلات کے مطابق ناٹنگھم میں انگلش شیروں نے کینگروز کا غرور خاک میں ملادیا۔
چوتھے ٹیسٹ میں ایک اننگز اور 78 رنز سے پچھاڑ کر تین ایک کی فیصلہ کن برتری کے ساتھ ایشیز سیریز اپنے نام کرلی۔ ناٹنگھم ٹیسٹ کی پہلی اننگز میں اسٹورٹ براڈ کے قہر نےآسٹریلین بیٹنگ لائن کا جنازہ نکال دیا۔
براڈ نے آٹھ کینگروز کا شکار کیا اور صرف ساٹھ رنز پر آسٹریلیا کا ڈبا گول کردیا۔ انگلینڈ نے پہلی اننگز تین سو اکانوے رنز پر تین سو اکتیس کی بڑی برتری حاصل کرنے کے بعد ڈیکلیئر کردی۔
دوسری اننگز میں بین اسٹوک نے آسٹریلین بیٹنگ لائن کا شیرازہ بکھیر دیا۔ مہمان ٹیم خسارہ ختم کئے بغیر ہی دو سو ترپن رنز پر آؤٹ ہوگئی۔
اسٹورٹ براڈ کو مین آف دی میچ کاایوارڈ دیا گیا۔ایشیز سیریز میں ناقص کارکردگی کے بعد آسٹریلین کپتان مائیکل کلارک نے ٹیسٹ سے ریٹائرمنٹ کا اعلان کردیا۔ پانچواں ٹیسٹ کلارک کے کیرئیر کا آخری ٹیسٹ ہوگا۔
