دبئی: قومی ٹیم کے سابق کپتان وسیم اکرم کا کہنا ہے کہ نمبر ون ٹیم کو ایشیا کپ میں بھی تگڑا مقابلہ کرنا ہوگا۔
قومی ٹیم کے سابق کپتان وسیم اکرم نے دبئی میں ایک تقریب کے دوران میڈیا سے گفتگو کرتے ہوئے کہا کہ بابر اعظم کی کپتانی میں بہتری آرہی ہے، ایشیا کپ میں پاک بھارت ٹاکرا اہم ہے لیکن باقی ٹیموں کو بھی آسان نہیں لیا جاسکتا۔
انہوں نے کہا کہ ایشیا کپ ایک لمبا ٹورنامنٹ ہے، کوئی ایک میچ نہیں ہے جسے کھیل کر کوئی بھی ٹیم سیمی فائنل میں جاسکتی ہے، ایشیا کپ 20 کے بجائے 50 اوور کا میچ ہے لہٰذا اس میچ کیلئے مختلف مائنڈ سیٹ اور مختلف حکمت عملی درکار ہوگی۔
وسیم اکرم نے کہا کہ ان میچز میں ہر ٹیم کے نوجوان بولرز کی کارکردگی 10 اوورز سے معلوم ہوگی کیوں کہ ہر بولر کے پاس اب 4 اوور کے بجائے 10 اوور ہوں گے۔
سابق کپتان کا کہنا تھا کہ پاکستانی ٹیم اور مینجمنٹ نئے طریقے کار آزما رہی ہے جس کے تحت ٹی ٹوئنٹی فارمیٹ میں نئے کھلاڑیوں حتیٰ کہ نئے کپتان کو بھی آزمایا گیا اب تو پاکستان کی جانب سے ایشیا کپ اسکواڈ کا بھی اعلان کردیا گیا ہے، اس ٹیم کا مقابلہ کرنا بھارت سمیت کسی بھی ٹیم کیلئے آسان نہیں ہوگا۔
وسیم اکرم نے کہا کہ ٹورنامنٹ کیلئے پاکستان اور بھارت دو اہم ٹیمیں ہیں جن کیلئے دنیا بھر سے شائقین کی سپورٹ ہے، دنیا بھر کی نظریں ان دونوں ٹیموں پر ہیں لیکن اس سب کے باوجود آپ دوسری ٹیموں کو نظر انداز نہیں کرسکتے کیوں کہ پچھلی مرتبہ سری لنکا ایشیا کپ جیت گیا تھا۔