مولانا فضل الرحمٰن کے بعد اب سابق صدر آصف زرداری کی بھی بلوچستان میں انٹری ہوئی ہے اور صوبے کے اہم رہنماؤں سے معاملات طے پانے لگے ہیں۔
اے آر وائی نیوز کے مطابق پی ڈی ایم کے سربراہ اور مولانا فضل الرحمٰن کے بعد اب سابق صدر آصف علی زرداری کی بھی ملک کے سب سے بڑے صوبے بلوچستان میں انٹری ہوئی ہے اور بلوچستان عوامی پارٹی (بی اے پی) کے رہنماؤں سے رابطے ہوئے ہیں۔
ذرائع نے اے آر وائی نیوز کو بتایا ہے کہ پیپلز پارٹی کے بلوچستان کے اہم رہنماؤں سے معاملات طے پانے لگے ہیں۔ سابق وزیر خزانہ اور بلوچستان عوامی پارٹی کے نائب صدر عاصم کرد گیلو کا پی پی میں شمولیت کا امکان ہے۔
پی پی ذرائع ک مطابق بلوچستان عوامی پارٹی کے دو اہم پی ایز سے معاملات طے پا گئے ہیں۔ عارف جان محمد حسنی اور سلیم کھوسہ بھی پیپلز پارٹی سے رابطے میں ہیں۔ دونوں رہنما جام کمال کابینہ میں وزیر رہ چکے ہیں۔
ذرائع کے مطابق چاغی سے سابق رکن قومی اسمبلی سردار فتح محمد حسنی بھی پیپلز پارٹی میں واپسی کیلیے تیار ہیں۔ اس کے علاوہ سابق وزیراعلیٰ بلوچستان ثنا اللہ زہری کے قریبی عزیز سابق ضلع چیئرمین خضدار آغا شکیل درانی سے بھی پی پی کے معاملات طے پا گئے ہیں۔
ذرائع کا کہنا ہے کہ پیپلز پارٹی کا بلوچستان کے مگسی، جمالی، جام، بھوتانی خاندانوں سے رابطوں پر غور جاری ہے۔ بلوچستان عوامی پارٹی کے رہنما پی پی قیادت سے جلد ملاقاتیں کریں گے۔
علاوہ ازیں بلوچستان عوامی پارٹی کے رہنماؤں سے ملاقات میں آصف زرداری کا کہنا ہے کہ پاکستان پیپلز پارٹی ہمیشہ سے بلوچستان کی آواز رہی ہے۔ بلوچستان بی بی شہید کے سب سے قریب تھا۔ اس صوبے کے لیے پی پی نے پہلے بھی بہت کیا اور ابھی بھی بہت کچھ کرنا باقی ہے۔
