گوہاٹی: آسام میں بھیانک طوفان کے ساتھ آسمانی بجلی گرنے سے کم از کم 14 افراد کی موت ہو گئی ہے۔
تفصیلات کے مطابق ریاستی ڈیزاسٹر منیجمنٹ اتھارٹی کا کہنا ہے کہ آسامی نئے سال کا آغاز تباہ کن طور پر ہوا ہے، متعدد اضلاع میں شدید طوفان نے 2 دنوں میں 14 افراد کی جانیں لے لیں اور 12 ہزار سے زیادہ مکانات کو نقصان پہنچایا۔
نئے سال کے پہلے دن جمعہ اور ہفتہ کو ریاست کے کئی حصوں میں شدید طوفان آیا جس سے 12 اضلاع میں 21 ہزار سے زیادہ لوگ متاثر ہوئے، چودہ افراد ہلاک ہوئے، مرنے والوں میں کم سن بچے بھی شامل ہیں۔
گرمیوں کے موسم میں آنے والے طوفان کو آسام میں ‘بورڈوسیلا’ کہا جاتا ہے، حالیہ طوفان جانی نقصانات کے علاوہ اپنے پیچھے تباہی کا ایک نشان چھوڑ گیا ہے، جس میں تباہ شدہ مکانات، اکھڑے ہوئے درخت اور ٹوٹی ہوئی بجلی کی لائنیں شامل ہیں۔
آسام، میگھالیہ اور اروناچل پردیش میں اس ماہ کے آغاز سے ہی گرج چمک کے ساتھ تیز بارش ہو رہی ہے جس کے نتیجے میں کچھ علاقوں میں سیلاب اور لینڈ سلائیڈنگ ہوئی ہے۔
بھارتی محکمہ موسمیات نے اگلے پانچ دنوں کے دوران اروناچل پردیش، آسام، میگھالیہ، ناگالینڈ، منی پور، میزورم اور تریپورہ میں بارش یا آسمانی بجلی گرنے کی پیشن گوئی کی ہے۔
